Qazaqstanda kommýnaldyq tólemderge beriletin áleýmettik kómek avtomattandyrylady
ASTANA. KAZINFORM – Elimizde kommýnaldyq tólemderge beriletin turǵyn úı kómegin taǵaıyndaý protsesi avtomattandyrylyp, óńirlerde eseptegish quraldardy jappaı ornatý josparlanyp otyr. Bul týraly Premer-mınıstrdiń orynbasary Qanat Bozymbaev Úkimet otyrysynda aıtty.
Vıtse-premer «Energetıkalyq jáne kommýnaldyq sektorlardy jańǵyrtý» ulttyq jobasyn iske asyrýda sheshýdi qajet etetin úsh negizgi mindetke toqtaldy. Birinshiden, artta qalǵan óńir ákimdikteri bıylǵy ınfraqurylymdyq jobalardyń ýaqytyly aıaqtalýyn erekshe baqylaýǵa alýy qajet.
– Ákimdikter bıylǵy jobalardy iske asyrýdy erekshe baqylaýǵa alyp, jóndeý jumystarynyń ýaqytyly aıaqtalýyn qamtamasyz etýi kerek. Sonymen qatar kelesi jylǵa arnalǵan barlyq óńirlik jobalar boıynsha daıyndyq jumystaryn aldyn ala pysyqtap, qajetti sharalardy ýaqytyly qabyldaý qajet, – dedi Qanat Bozymbaev.
Ekinshi mańyzdy másele – kommýnaldyq sektordy tsıfrlandyrý.
Onyń aıtýynsha, tutynýshylardy esepke alý quraldarymen tolyq qamtymaıynsha, tsıfrlandyrýdy júzege asyrý múmkin emes.
Osyǵan baılanysty Energetıka, Ónerkásip jáne qurylys mınıstrlikterine ákimdiktermen birlesip, ár óńirdegi esepke alý aspaptaryna degen naqty qajettilikti anyqtap, 2029 jylǵa deıingi is-qımyl josparyn ázirleý tapsyryldy.
Úshinshi baǵyt turǵyn úı kómegin alý rásimderin jeńildetýge qatysty. Qazir kommýnaldyq tólemderdi óteýge beriletin áleýmettik kómekti taǵaıyndaý protsesin avtomattandyrý jumystary júrgizilip jatyr.
– Protsesterdi tolyq avtomattandyrý maqsatynda Ónerkásip jáne qurylys mınıstrligi, Eńbek jáne halyqty áleýmettik qoldaý mınıstrligi jáne ákimdikter birlesip, qysqa merzimde Biryńǵaı esep aıyrysý ortalyqtarynyń memlekettik aqparattyq júıelerimen tıisti ıntegratsııa júrgizýi qajet, – dedi Qanat Bozymbaev.
Osylaısha Úkimet kommýnaldyq salany tsıfrlandyrýdy jedeldetip, turǵyndardyń kommýnaldyq tólem boıynsha memlekettik qoldaý alýyn jeńildetpek.
Aıta keteıik, Memleket basshysynyń tapsyrmasymen Úkimet «Energetıkalyq jáne kommýnaldyq sektorlardy jańǵyrtý» ulttyq jobasyn iske asyryp jatyr. Elimizdegi búkil bazalyq ınfraqurylymnyń aýqymdy qurylysy halyqtyń turmys sapasyn arttyrýǵa jáne ekonomıkanyń odan ári ornyqty ósýin qamtamasyz etýge baǵyttalǵan.
Qazaqstannyń kommýnaldyq sektoryn jańǵyrtýǵa 6 halyqaralyq qarjy ınstıtýty kómektesedi.
