Qazaqstanda kommýnaldyq sektorǵa qatysty jańa platforma iske qosyldy
ASTANA. KAZINFORM – Qazaqstanda energetıka jáne turǵyn úı-kommýnaldyq sharýashylyq ınfraqurylymyn jańǵyrtýǵa baǵyttalǵan jańa elektrondyq platforma iske qosyldy. Bul týraly Tabıǵı monopolııalardy retteý komıteti málimdedi.
Prezıdent joldaýynda ınfraqurylymnyń tozý deńgeıin tómendetý, energetıkalyq jáne kommýnaldyq júıelerdi basqarýdyń jańa modelin qalyptastyrý, tarıftik saıasattyń ashyqtyǵyn qamtamasyz etý mindetteri erekshe atap ótilgen. Osy baǵytta aýqymdy derekter bazalary men tsıfrlyq platformalardy damytý negizgi basymdyqtardyń biri bolyp belgilendi.
- Energetıkalyq jáne kommýnaldyq sektorlardy jańǵyrtý (EKSJ) aıasynda 2025 jylǵy qarashadan bastap «Samuryq-Qazyna Kontrakt» JShS-nyń elektrondyq satyp alý júıesi bazasynda jańǵyrtý jobalaryna arnalǵan elektrondyq platforma iske qosyldy. Endi barlyq tabıǵı monopolııalar sýbektileri ınfraqurylymdy jańǵyrtý boıynsha ótinimderin onlaın rejımde bere alady. Ótinimder tolyq tsıfrlyq formatta qaralyp, ár jobaǵa biregeı ID berilip, barlyq is-áreket ETsQ arqyly rastalady, - delingen aqparatta.
Platforma ótinim berýden bastap jobalardy paıdalanýǵa berýge deıingi tolyq tsıkldi avtomattandyrady. Munda jobalardy josparlaý, irikteý, kelisý jáne monıtorıng júrgizý, qarjylandyrý tetikterin aıqyndaý, paıyzdyq mólsherlemeni sýbsıdııalaý, EPC-kelisimsharttardy rásimdeý, qazaqstandyq óndirýshilerden offteık-mehanızm arqyly jabdyq satyp alý úderisteri qamtylǵan.
Júıe memlekettik reestrlermen jáne salalyq derekter bazalarymen biriktirilgendikten, tekserister jyldam júrgizilip, ákimshilik kidirister azaıady. Mınıstrlikter, ákimdikter jáne ótinim berýshiler jeke kabınetter arqyly qol jetkize alady. Sonymen birge onlaın-karta, ınteraktıvti panelder jáne ashyq analıtıkalyq portal ázirlenip jatyr. Bul nysandardyń mártebesin naqty ýaqytta baqylaýǵa múmkindik beredi.
- Energetıka jáne TÚKSh salalarynda tsıfrlandyrý jumystary tek platformamen shektelmeıdi. Ulttyq joba aıasynda sý, jylý jáne elektr energııasyn esepke alý boıynsha biryńǵaı aqparattyq júıeniń arhıtektýrasy qalyptastyrylady. Júıe MQQK AAJ-men, memlekettik energetıkalyq reestrmen, EnergyTech jáne WaterTech júıelerimen biriktiriledi. Nátıjesinde Smart Turmys biryńǵaı platformasy iske qosylyp, kommýnaldyq sektordaǵy barlyq derekter ortalyqtandyrylǵan túrde jınalyp, taldanatyn bolady, - dep túsindirdi komıtetten.
Kommýnaldyq ınfraqurylymdy jańǵyrtýǵa baǵyttalǵan jańa elektrondyq platforma ashyqtyqty, baqylaýdy jáne sapaly qyzmet kórsetýdi kúsheıtip, EKSJ jobasynyń negizgi qozǵaýshy kúshine aınalmaq.
Aıta keteıik, 1 qańtardan bastap jobalar saraptamasy jańa tsıfrlyq portalǵa ótedi.