Qazaqstanda kómirqyshqyl resýrstarynyń áleýeti úsh esege artýy yqtımal - U.Qarabalın

ASTANA. QazAqparat - Qazaqstanda kómirqyshqyl resýrstarynyń áleýeti úsh esege artýy yqtımal. Bul týraly búgin KAZENERGY Eýrazııalyq forýmynda sóz alǵan QR Energetıka mınıstriniń birinshi orynbasary Uzaqbaı Qarabalın málim etti.

«2013 jyly bizdiń eldiń jetekshi geolog-munaıshylar 15 basseın boıynsha kóp jyldyq barlaý jumystaryn aıaqtady. Bul Qazaqstanda táýelsizdik jyldary jasalǵan alǵashqy osyndaı jumys edi. Ol geologııalyq ádister men tehnologııalardyń jańa úlgileri arqyly jasaldy. Nátıjesi keremet boldy. Ol boıynsha, Qazaqstanda kómirqyshqyl resýrstarynyń áleýeti úsh esege artýy yqtımal», - dedi ol.

Vıtse-mınıstrdiń málim etkenindeı, munda eń úlken qyzyǵýshylyq Kaspıı mańy oıpatyna túsip otyr. «Eýrazııa» dep atalyp ketken sol jobany zertteýdiń eń alǵashqy qyrlary eki jyl buryn dál osy KAZENERGY forýmynda aıqyndalyp edi.

«Jospardyń elementteriniń biri rekordtyq tereńdiktegi 15 shaqyrymdyq uńǵyma jasaý bolǵan. Qazir ol joba júzege asyp jatyr. Joba boıynsha qazaqstandyq komanda jasaqtaldy. Taraptar arasynda kelissózder júrýde. Memleket tarapynan salyqtyq jeńildikter túrinde kómek jasalmaq. Biz jobanyń sátti oryndalatynyna senemiz. Álem tereń burǵylaý tájirıbesine ıe bolady», - dep atap ótti birinshi vıtse-mınıstr.

Onyń sózi boıynsha, elde 10 jyl ishinde 50-den astam munaı kenishteri ashylǵan. Olardyń jalpy óndiriletin qorynyń kólemi búginde 160 mln. tonnany quraıdy.