Qazaqstanda kómir tasymalyna vagon jetkilikti - QTJ
ASTANA. QazAqparat - Jyl basynan beri «QTJ-Júk tasymaly» AQ 83,4 mıllıon tonna kómir tasymaldady. Qazaqstandyq tutynýshylarǵa 56,6 mıllıon tonna kómir jetkizilip, bul kórsetkish ótken jylmen salystyrǵanda 16,5 paıyzǵa joǵary. Bul týraly QTJ baspasóz qyzmetiniń málimetinde aıtylǵan, dep habarlaıdy QazAqparat.
«QTJ-Júk tasymaly» AQ basqarma tóraǵasy Oralhan Kýlakovtyń sózine qaraǵanda, kompanııa kómir tasymalyna erekshe mán berip otyr. Jyl basynan beri aı saıyn óńirdegi júk jóneltýshiler, júk qabyldaýshylar, jergilikti atqarýshy organdar, múddeli mınıstrlikter men mekemelerdiń ókilderiniń qatysýymen kezdesýler ótkizildi.
Ashyq pikirtalastarda strategııalyq taýarlardy ýaqytyly jetkizý máseleleri qaraldy. QR Investıtsııa jáne damý, Energetıka mınıstrlikterimen, «Samuryq-Energo» AQ-men birlesip 2017-2018 jyldary jylý maýsymyn kómirmen qamtamasyz etý sharalarynyń jospary ázirlendi.
O. Kýlakovtyń aıtýynsha, «QTJ» UK» AQ-nyń Qazaqstannyń óńirlerin kómirmen qamtamasyz etý úshin jetkilikti vagondary bar. Qazirgi tańda «QTJ» UK» AQ parkinde 50 myńnan astam ashyq vagon jumyldyryldy. Mamyr aıynan bastap ashyq vagondar sany 5970-ke artty. «Qaztemirtrans» AQ-nyń bir myńnan astam ashyq vagonyn paıdalaný merzimi uzartyldy. Bir myń vagondy alýǵa lızıng sharttary bekitildi. Onyń syrtynda kórshiles elderdiń temirjol ákimshilikterimen ashyq vagondardy usyný boıynsha ózara kómektiń kelisimi jasaldy. Basqa temirjol ákimshilikteriniń 1200-den astam jartylaı vagony tartyldy.
Júk jóneltýshilerdiń suranysyna oraı kómir tasymalyna táýligine 5000 ashyq vagon beriledi. Jalpy kólemnen 40 paıyz kómir «Qaztemirtrans» AQ vagondaryna tıeledi. Atap óterligi, kómir otynyn tasymaldaýdy júk jóneltýshilerdiń ózderi josparlaıdy.
