Qazaqstanda kómir baǵasyna qatysty tekserý júredi
NUR-SULTAN. QazAqparat – Búgin Úkimet otyrysynda Premer-Mınıstr Asqar Mamın óńirlerge qajetti kólemde kómirmen qamtamasyz etýdi tapsyrdy, dep habarlaıdy QazAqparat tilshisi.
«Jylytý maýsymyna daıyndyq jumystary júrip jatyr. Degenmen de bekitilgen kesteden qalyp qoıý jaǵdaılary da oryn alýda. Kommýnaldyq qajettilikter men turǵyndar úshin kómir daıyndaý deńgeıi áli de tómen», - dep toqtaldy Úkimet basshysy.
Osyǵan baılanysty A. Mamın tıisti tapsyrmalardy berdi. Birinshiden, ákimder josparlanǵan jóndeý jumystaryn belgilengen merzimde aıaqtaýdy qamtamasyz etip, qajetti kólemdegi otyndy aldyn ala jetkizýdi atqarýy kerek.
«Іshki naryqta baǵanyń ósýine jáne kómirdiń tapshylyǵyna jol bermeý maqsatynda óńir ákimderi 2 apta merzimde kómir daıyndaıtyn ári ony satatyn oryndardyń qazirgi jáı-kúıin, jetkizý kestesin, kómir baǵasynyń negizdi bolýyn, sondaı-aq onyń sapasy belgilengen tártippen tekserý qajet. Indýstrııa mınıstrligi QTJ kompanııasymen birge kómir jetkizý úshin qajetti kólemdegi vagondardyń daıyn bolýyn qamtamasyz etsin», - dedi Premer-Mınıstr.
