Qazaqstanda kómir baǵasy qansha
«Jergilikti atqarýshy organdardyń málimetterine sáıkes, búgingi kúni túrli ken oryndarynan óndirilgen ártúrli kómir markasy óndirý jáne satý núktesine deıingi araqashyqtyqqa baılanysty 7 myńnan 19 myń teńgege deıin aýytqyp turady. Máselen, biz Nur-Sultan qalasy boıynsha monıtorıng jasadyq. Qazirgi ýaqytta qalanyń ártúrli bóliginde 11 núktede kómir satýmen aınalysatyn 8 kompanııa aıqyndalǵan. Ortasha baǵa jetkizýdi esepke almaǵanda 12 myń teńge. 24-30 qazan aralyǵynda elordaǵa 141 vagon, 9,7 myń tonna kómir jetkizildi. Onyń ishinde Maıkóbeden 72 , Shubarkólden 34, Qarajyradan 35 vagon kómir keldi. Shubarkól kómiriniń tonnasy 12,5 myń, Qarajyraniki 12,7 myń, Maıkóbeniki 13 myń, Bogatyr-Kómirdiki 9,5 myń teńgeden», - dedi ol Úkimet úıinde ótken baspasóz máslıhatynda.
Komıtet basshysy turǵyndar tarapynan kómirdi jetkizýshilerge qatysty shaǵymnyń kóbeıip ketýine baılanysty tekserý júrgizilgendigin aıtty.
«Biz mashınalarǵa qatysty mán-jaıdy anyqtadyq. Kómir tasymaldaýshylardyń úsh túri bar. Birinshisi, kómir razrezderine ózderi baryp, tıep alyp halyqqa jetkizetinder. Ekinshisi, temir jol tuıyqtarynan kómirdi Nur-Sultannyń sheginde 100 shaqyrymǵa deıin jetkizip beretinder. Úshinshi jetkizýshiler kómirdi satyp alyp jol boıynda turatyndar. Olar qymbattyraq baǵaǵa satyp alatyn adamdardy kútip turady. Tasymaldaýshylardyń dál osy úshinshi túrin taksıshiler deýge bolady. Olar kómirdi satyp alyp ústeme baǵaǵa qaıta satady. Biraq, mundaı adamdar óte az jáne kómir baǵasyna áser ete almaıdy», - dedi Q.Baıytov.
