Qazaqstanda kombaın men traktor óndirisin ulǵaıtý kózdelip otyr
ASTANA.KAZINFORM — Aýyl sharýashylyǵy vıtse-mınıstri Talasbek Qanafın men «Rostselmash» kompanııasynyń bas dırektory Aleksandr Vınogradov óndiristi jergiliktendirý deńgeıin odan ári arttyrý máselelerin talqylady. Bul týraly vedomstvonyń baspasóz qyzmeti málim etti.
Talasbek Qanafın otandyq aýyl sharýashylyǵy mashına jasaý salasyn damytýdyń mańyzdylyǵyn atap ótip, birlesken jobalardyń elimizdiń agroónerkásiptik keshenin (AÓK) nyǵaıtýdaǵy róline toqtaldy.
— Mashına-traktor parkin ýaqytyly jańartý mınıstrliktiń negizgi basymdyqtarynyń biri. «Rostselmashpen» birlesken óndiris jobalary óz tıimdiligin aıqyn dáleldep keledi. Yntymaqtastyq ornaǵan ýaqyttan bastap Kókshetaýda júzdegen jumys orny qurylyp, otandyq agrarshylar básekege qabiletti baǵamen senimdi kombaındar men traktorlarǵa qol jetkizdi. Osyǵan baılanysty biz óndiristi jergiliktendirýdi tereńdetý, zamanaýı tsıfrlyq júıelerdi engizý jáne servıstik qyzmet kórsetý sapasyn arttyrý jónindegi josparlardy qoldaımyz, — dedi vıtse-mınıstr.
Óz kezeginde Aleksandr Vınogradov Qazaqstanmen yntymaqtastyq kompanııa qyzmetiniń negizgi strategııalyq baǵyttarynyń biri bolyp qala beretinin atap ótti.
— Bizdiń kópjyldyq áriptestigimiz — bul jaı ǵana tehnıka jetkizý emes, el ishinde sapaly ónim óndirýge múmkindik beretin tereń ónerkásiptik kooperatsııa. Bizdiń maqsatymyz — qazaqstandyq agrarshylarǵa zamanaýı ári qoljetimdi agrotehnologııalyq sheshimder usyný. Biz jańa tehnıka úlgilerin jergiliktendirý úderisine ınjenerlik jáne tehnologııalyq áleýetimizdi jumyldyrýǵa daıynbyz. Osy arqyly óńirdiń azyq-túlik qaýipsizdigin qamtamasyz etýge birlesip úles qosýdy kózdeımiz, — dedi «Rostselmash» kompanııasynyń bas dırektory.
Qazaqstan men «Rostselmash» arasyndaǵy aýyl sharýashylyǵy tehnıkasyn birlesip óndirý salasyndaǵy kooperatsııa 2019 jyldan beri Kókshetaý qalasyndaǵy eki iri kásiporyn — «Kazrost Engineering Ltd.» JK jáne «Qazaqstandyq agroınnovatsııalyq korporatsııa» seriktestigi (QAIK) bazasynda júzege asyrylyp keledi. Osy kezeń ishinde jobalarǵa tartylǵan ınvestıtsııalardyń jalpy kólemi 35 mln AQSh dollarynan asty, al óndiriste eńbek etetin qyzmetkerler sany 350 adamǵa jetti.
Qazirgi ýaqytta Qazaqstanda VECTOR 410KZ, ACROS 550, ACROS 595 Plus jáne T500 astyq jınaıtyn kombaındarynyń, sondaı-aq «Rostselmash 2400» joǵary qýatty traktorynyń óndirisi jergiliktendirilgen.
2023 jyly qazaqstandyq kásiporyndar 536 «Rostselmash» kombaıny men 168 traktor óndirdi. 2024 jyly óndiris kólemi 653 kombaın men 193 traktorǵa jetti. Ótken jyldyń qorytyndysy boıynsha 600-den astam tehnıka birligi shyǵaryldy. Al 2026 jyldyń alǵashqy bes aıynda 280-nen astam tehnıka birligi óndirildi.
Kezdesý qorytyndysynda Talasbek Qanafın men Aleksandr Vınogradov ónerkásiptik kooperatsııany odan ári damytýǵa jáne Qazaqstannyń mashına-traktor parkin otandyq qurastyrylǵan zamanaýı tehnıkamen jańartýdy qarqyndy júzege asyrýǵa yntalylyq bildirdi.
Taraptar óndiristi jergiliktendirýdi tereńdetý, servıstik ınfraqurylymdy damytý jáne agroónerkásip salasyna tsıfrlyq ınnovatsııalyq sheshimderdi engizý baǵytyndaǵy birlesken jumysty tıimdi jalǵastyrýǵa ýaǵdalasty.
Aıta keteıik, aýyl sharýashylyǵy tehnıkasy parkiniń tozý deńgeıi 10%-ǵa tómendedi. Osy oraıda memlekettik qoldaý sharalary eń aldymen otandyq óndirýshilerdi qoldaýǵa baǵyttalǵan. Mysaly, otandyq tehnıkany satyp alý kezinde sýbsıdııa 30%-dy qurasa, ımporttyq tehnıkaǵa 15-25% kóleminde beriledi. Sondaı-aq jeńildetilgen lızıng baǵdarlamasynda otandyq tehnıkaǵa basymdyq beriledi.
