Qazaqstanda qomaqty somaǵa 13 ınnovatsııalyq grant beriledi
2017 jyldyń tamyzynan bastap qazan aıy aralyǵynda ótinim qabyldaý merziminde jobalar boıynsha 208 usynys kelip tústi. Onyń ishinde 123 ótinim tehnologııalardy kommertsııalandyrýǵa, 20-sy salalardy tehnologııalyq damytýǵa, 65-i jumys istep turǵan kásiporyndardy tehnologııalyq damytýǵa baǵyttalǵan.
Granttyq baǵdarlamaǵa qatysýda Astana men Almaty qalalarynyń turǵyndary belsendilik tanytqan kórinedi.
Erejege sáıkes, úmitkerlerdi tıimdi irikteý turǵysynda ótinimder boıynsha tehnologııalyq, qarjylyq-ekonomıkalyq ári quqyqtyq saraptamalar júrgizildi.
«Innovatsııalyq grantty alýǵa kelip túsken 208 ótinimniń ishinde 123-i tehnologııalyq saraptamaǵa jiberildi. Budan bólek, 36 ótinimdi úmitkerler ózderi qaıtaryp alsa, durys rásimdelmeýinen 33-i qarastyrýdan alynyp tastaldy. Al taǵy 16 joba ereje talaptaryna sáıkes kelmedi», - delingen baspasóz qyzmetiniń málimetinde.
Tehnologııalyq saraptamanyń nátıjesi boıynsha, 123 ótinimniń arasynda 19-y oń qorytyndy aldy.
«Tehnologııalyq saraptamadan ótken 19 ótinim qarjylyq-ekonomıkalyq ári quqyqtyq saraptamaǵa baǵyttaldy. Nátıjesinde, qarjylyq-ekonomıkalyq saraptamadan oń qorytyndyny 14-i, al quqyqtyq saraptamadan 18-i aldy», - delingen agenttik habarlamasynda.
Munymen qosa, saraptamadan ótken ótinimder táýelsiz komıssııa tarapynan qarastyryldy. Komıssııa quramyna mınıstrlikterdiń, memlekettik jáne qoǵamdyq uıymdardyń, sondaı-aq agenttiktiń ókilderi endi.
«2017 jyldyń qarashasy men 2018 jyldyń qańtarynda ótken komıssııanyń otyrystary nátıjesinde, búginde 2,4 mlrd teńge somasyndaǵy 13 ınnovatsııalyq grantty berý sheshimi jasaldy», - deıdi Tehnologııalyq damý jóninen ulttyq agenttigi ókilderi.
