Qazaqstanda qolma-qol aqshasyz tólemder 2,1 ese ósti

ALMATY. QazAqparat - Qazaqstanda qolma-qol aqshasyz tólemder bir jylda 2 ese artty. Ulttyq ekonomıka mınıstrligi osyny ári qaraı damytý úshin memleket tarapynan qosymsha bonýstarmen qamtamasyz etýdi josparlap otyr, dep habarlaıdy QazAqparat tilshisi Ranking.kz silteme jasap.

Osy jyldyń mamyrynda 25,1 mln tólem kartochkalary aınalymda boldy. Bir jylda olardyń sany 20,8% -ǵa ósti. Ótken jyldyń osy kezeńinde kartochkalar sany 20,8 mln bolǵan.

Naryqtyń basym bóligi dástúrli debettik kartalarmen aınalysady: jalpy karta sany - 18,9 mıllıon, debettik karta úlesi - 75,3%. Nesıe kartalary - 20,8%. Nesıe jeńildigi bar kartochkalardyń jáne aldyn ala tólengen kartochkalardyń úles salmaǵy - 3,9% nemese 966,9 myń.

Kartochka qoldanýshylar sany bir jylda 20,2% -ǵa artyp, 21,8 mln-ǵa jetti. 2018 jyly Qazaqstanda 18,1 mln adam kartochka paıdalandy. Bir jyldyq ósim - 21,7%.

QR Ulttyq ekonomıka mınıstri Rýslan Dálenov qolma-qol aqshasyz tólemderdi qoldaý - el ekonomıkasyn damytýdyń basym baǵyttarynyń biri ekenin atap ótti. Salyq bazasyn keńeıtý jáne salyq tólemderin jeńildetýge de yqpaly bar.

Sondaı-aq, ol qolma-qol aqshasyz tólemdi tańdaǵan azamattardy yntalandyrý maqsatynda arnaıy jobanyń ázirlenip jatqanyn aıtty. Saýda ortalyqtarynda kartamen tólem jasaǵandarǵa bonýstar túsedi. Bul qarjylaı syılyqty turǵyndar salyq tóleýge nemese saýda jasaǵanda jumsaı alady. Ol úshin banktermen birlesip jumys isteý qajet. Igi bastama 2020 jyly usynylady.

Aǵymdaǵy jyldyń bes aıynda qolma-qol aqshasyz tólemder kólemi 3,7 trıllıon teńgege jetti. Ótken jyldyń osy kezeńimen salystyrǵanda 2,2 ese ulǵaıǵan.

Barlyq qolma-qol aqshasyz tólemderdiń 68% Almatyǵa tıesili - 2,6 trıllıon teńge, Nur-Sultanda onyń kólemi - 321,6 mlrd teńge.

Qyzylorda, Soltústik Qazaqstan jáne Jambyl oblystarynda qolma-qol aqshasyz tólemder azaıǵan: onyń jalpy úlesi 1,7%-dy quraıdy.