Qazaqstanda qolma-qol aqshasyz tólem 26 esege ósken

NUR-SULTAN. QazAqparat – Qazaqstan kóptegen salada qarjy ındýstrııasyn tsıfrlyq damytý boıynsha aldyńǵy qatarda tur. Bul týraly QR Ulttyq bankiniń tóraǵasy Erbolat Dosaev Qazaqstan qarjygerleriniń IX kongresinde aıtty, dep habarlaıdy QazAqparat.

«Tsıfrlandyrý búkil álem boıynsha qarjy naryqtaryn qalpyna keltirýdiń negizgi qozǵaýshy kúshine aınaldy. Qazaqstan kóptegen salada qarjy ındýstrııasyn tsıfrlyq damytýdyń aldyńǵy qatarynda keledi. Tsıfrlyq servısterdiń yqpalymen biz eldegi qolma-qol aqshasyz tólemderdiń aıtarlyqtaı óskenin baıqap otyrmyz. Osylaısha, 5 jyl ishinde halyqtyń qolma-qol aqshasyz tólemderiniń kólemi 26 ese ósti, al Internet jáne mobıldi servıster arqyly tólemderdiń úlesi 22%-ten 83%-ke deıin ulǵaıyp, rekordtyq kórsetkishke jetti», - dedi E. Dosaev.

Ulttyq bank tóraǵasy ózgerister qarqynyn toqtatpaı, qarjy salasyn odan ári tsıfrlandyrýdy qoldaý qajettigin aıtty.

«Qarjy naryǵynyń bárine birdeı qoljetimdi tsıfrlyq ınfraqurylymy – Ulttyq bank úshin basym baǵytta. Prezıdent tapsyrmasymen qurylatyn Ulttyq tólem júıesi men Tsıfrlyq bıometrııalyq sáıkestendirý platformasy – onyń mańyzdy quramdas bólikteri. Atalǵan reformalar qarjylyq qyzmet kórsetý salasyn barynsha joǵary sapaly deńgeıge kóterýge múmkindik beredi. Jańartylǵan tsıfrlyq ınfraqurylym naryqtyń barlyq qatysýshylary úshin qoljetimdi bolady jáne jańa býynnyń qarjylyq servısterin jyldam jáne arzan jasaýǵa múmkindik týǵyzady», - dep túsindirdi E. Dosaev.