Qazaqstanda qolma-qol aqshasyz tólem kólemi 10 ese ósti

ALMATY. KAZINFORM – Qazaqstannyń qarjy sektory qazir ekonomıkany tsıfrlandyrý boıynsha aldyńǵy qatarda. Bul týraly Ulttyq bank tóraǵasy Tımýr Súleımenov málim etti.

«Sońǵy 5 jylda halyqtyń qolma-qol aqshasyz tólemderi men tranzaktsııalary 10 ese ósti. Bul - bólshek saýda aınalymynyń 90%-ǵa jýyǵy degen sóz. Tsıfrlyq arnalar qarjylyq qyzmetterdi kórsetýdiń basym tásiline aınaldy, ıaǵnı 10 tranzaktsııanyń 8-i onlaın-bankıng arqyly júzege asady. Al mobıldi bankıng qosymshalary elektrondy kommertsııanyń negizgi ınterfeısine aınaldy»,- dep atap ótti Tımýr Súleımenov Qazaqstan qarjygerleriniń kongresinde.

Degenmen, atqarylatyn jumystardyń bar ekenin de tilge tıek etti.

«Nesıelerdiń enýine qatysty máseleler bar, bul basqa eldermen salystyrǵanda bizdiń elde aıtarlyqtaı tómen – JІÓ-ge qatysty shamamen 27%. Nesıe portfeliniń qurylymynda belgili bir máseleler bar. Sondyqtan da Memleket basshysy Q.Toqaev ekonomıkany yryqtandyrý (lıberalızatsııa) týraly aıtqan bolatyn. Jarlyqta arnaıy aıtylǵan naqty sektordaǵy tereń reformalarǵa erekshe toqtaldy. Sonymen birge, qarjy sektory retinde biz naqty sektor úshin bul múmkindikti jasaýymyz kerek», - dedi Ulttyq bank basshysy.

Osyǵan deıin ol 2024 jyldyń toǵyz aıynda Qazaqstan ekonomıkasy 4 paıyzǵa óskeni týraly aıtqan bolatyn.