Qazaqstanda qolma-qol aqsha aınalymy azaımaı tur - G. Qaraǵusova
Búgin Parlament Májilisinde qolma-qol aqshasyz aınalymdy yntalandyrý máselesine arnalǵan dóńgelek ústel barysynda depýtat Gúljan Qaraǵusova osylaı málim etti.
Depýtattyń aıtýynsha, álemdik tájirıbe kórsetkenindeı, damyǵan elderde qolma-qol aqsha qarajatyn meılinshe azaıtý júıeli jolǵa qoıylǵan. Óıtkeni, álemdik ekonomıkada qolma-qol aqsha aınalymynyń artýy bir jaǵynan «kóleńkeli ekonomıkaǵa» jol ashsa, ekinshi jaǵynan ony tolyq qadaǵalaý da múmkin bolmaıdy. Osynyń saldarynan aqshany jylystatý, terrorızmdi qarjylandyrý sekildi keleńsiz jaǵdaılar oryn alyp jatady.
«Qazaqstan umtylatyn álemniń damyǵan 30 elinde aqsha aınalymynyń 90 paıyzy qolma-qol aqshasyz júzege asady. Ondaı elderde tipti shaǵyn dúkenderdiń ózinde tólem kartalarmen júzege asady. Bizge de osy joldy ustaný kerek. Bul baǵytta zańnamalyq baza Qazaqstanda qabyldanǵan. Alaıda, ókinishke qaraı, zańnamada qamtylǵan mindetter áli de jaqsartýdy talap etedi», - deıdi G. Qaraǵusova.
Onyń aıtýynsha, depýtattardyń bastamasymen 2015 jyldyń qańtarynan bastap kásipkerlik sýbektilerine qolma-qol aqshamen jumys jasaýǵa tyıym salynǵan bolatyn. Alaıda, jergilikti jerlerde jaǵdaıǵa baılanysty bul norma keıinge shegerilgen.
«Bul keıinge shegerý degen múldem bolmaıdy degendik emes. Osy shegerýdiń ózi elimizde qolma-qol aqshasyz aınalymda úlken problemalardyń bar ekenin kórsetedi. Qolma-qol aqsha aınalymy tómendegen joq, kerisinshe daǵdarys jyldary olardyń mólsheri artyp ketken tárizdi. 2012 jyly qabyldanǵan zań boıynsha jeke kásipkerler, zańdy jáne jeke tulǵalar úshin qolma-qol aqsha aınalymyna tyıym salý kózdelgen bolatyn, biz bul normany 2016 jyldyń 1 qańtarynan engizýdi qarastyramyz», - dedi G. Qaraǵusova.
Depýtattyń aıtýynsha, qolma-qol aqshasyz tólem kartalar naryǵy bul azamattardyń problemasy emes. «Bul ınfraqurylymnyń joqtyǵynan týyndaǵan másele. Sondyqtan da, azamattar zańnyń osy talabyn oryndaı almaı otyr», - dedi ol.