Qazaqstanda kollektorlardyń derbes qylmystyq jaýapkershiligi engizilmek

Kollektor uıymdar bereshegi bar adamdarǵa eleýli qysym jasap jatyr. Bul týraly Májilis depýtaty Ashat Aımaǵambetov aıtty, dep habarlaıdy Kazinform.

«Kollektorlardyń derbes, ákimshilik jáne qylmystyq jaýapkershiligine qatysty másele Parlamentte talqylanady. Qazir kollektorlyq uıymdarǵa bankter ózderiniń (problemaly kredıtterdi) nesıelerin úlken dıskontpen, ıaǵnı jeńildikpen satyp júrgenin baıqadyq. Óz kezeginde kollektorlar qaryz alǵan adamdardan bereshek qarajatty tolyǵymen óndirip alýǵa tyrysady jáne adamdarǵa qaryzyn óteýge tıisti merzim bermeıdi. Máselen, bankterde bereshekti bólip tóleý qarastyrylǵan. Al kollektorlar adamdarǵa eleýli qysym jasaıdy», - dedi A. Aımaǵambetov Kazinform tilshisine bergen suhbatynda.

Bul turǵyda ol kollektorlar qaryzdy qaıtarý kezinde keıde zań buzý áreketterine baryp jatqany týraly aqparat depýtattarǵa kelip túsip jatqanyn aıtty.

«Sondyqtan kollektorlardyń jumysyn retteý, olardyń jaýapkershiligin kúsheıtý óte mańyzdy dep sanaımyn. Bankterge óndirip almaǵan qaryzdaryn osy kollektorlarǵa dıskontpen satqyzbaý máselesin nazarǵa alý kerek», - dedi depýtat.

Sonymen qatar A. Aımaǵambetov qazir bankterdiń smartfondaǵy túrli qosymshasyn paıdalanyp, azyq-túlikti qaryzǵa alyp jatqan otbasylar bar ekenin aıtty.

«Jaqynda bir zeınetkerdiń oqıǵasyn estidim. Onyń stýdent nemeresi qymbat smartfondy nesıege alǵan. Qazir sol qaryzdy zeınetker ájesi tólep jatyr. Jalpy, bul salada sheshýdi qajet etetin máseleler barshylyq. Sonymen qatar, halyqtyń ál-aýqatyn kóterý baǵytynda keshendi sharalar qabyldaý kerek. Keıbir otbasylar azyq-túligin qaryzǵa alyp jatyr», - dedi depýtat.

Aıta keteıik, búgingi Májilistegi Parlament tyńdaýynda Qarjy naryǵyn retteý jáne damytý agenttiginiń tóraǵasy Mádına Ábilqasymova Bas prokýratýramen birlesip kollektorlardyń derbes ákimshilik jáne qylmystyq jaýapkershiligin engizý jóninde túzetýler ázirlengenin aıtty. Bul usynystar Parlament Májilisiniń qaraýynda jatyr.