Qazaqstanda kolledjderge qujat qabyldaý jalǵasyp jatyr

Mınıstrliktiń málimetinshe, bıyl jergilikti atqarýshy organdar memlekettik bilim berý tapsyrysy aıasynda tehnıkalyq jáne kásiptik bilim berý uıymdaryna 140 myń grant bólgen.

– Memlekettik bilim berý tapsyrysynyń basym bóligi eńbek naryǵynda suranysqa ıe tehnıkalyq mamandyqtarǵa baǵyttalǵan. Sonymen qatar jasandy ıntellekt tehnıgi, mehatronıka, jańartylatyn energetıka, grafıkalyq anımatsııa tehnıgi jáne ekologııalyq týrızm menedjeri sekildi jańa mamandyqtar engizildi, – delingen mınıstrlik habarlamasynda.

Kolledjderge qabyldaý kezinde birqatar sanattaǵy talapkerlerge kvota qarastyrylǵan. Atap aıtqanda, aýyl jastaryna – 35%, múgedektigi bar adamdarǵa – 10%, kópbalaly otbasylardan shyqqan balalarǵa – 5%, jetim balalar men ata-anasynyń qamqorlyǵynsyz qalǵan balalarǵa – 1% kvota bólinedi. Budan bólek, zańnamada kózdelgen taǵy alty sanat úshin jeńildikter qarastyrylǵan.

Qujattardy eGov.kz portaly arqyly nemese tikeleı kolledjge tapsyrýǵa bolady. Árbir talapker tórt mamandyq pen tórt kolledjdi tańdaýǵa múmkindik alady.

– Jumysshy biliktiligi boıynsha qujat qabyldaý 27 tamyzǵa deıin jalǵasady. Bul baǵytqa túsýshiler emtıhansyz, suhbattasý nátıjesi boıynsha qabyldanady. Orta býyn mamandyqtaryna qujat qabyldaý 20 tamyzǵa deıin júrgizilip, konkýrs 23–24 tamyz kúnderi attestattyń ortasha baly negizinde ótedi, – dep málimdedi mınıstrlik.

Pedagogıkalyq jáne medıtsınalyq mamandyqtarǵa qujat qabyldaý 10 tamyzǵa deıin jalǵasady. Konkýrs 16–17 tamyzda ótedi. Pedagogıkalyq mamandyqtarǵa túsýshiler suhbattasýdan, esse nemese dıktanttan ótse, medıtsınalyq mamandyqtarǵa arnaıy emtıhan, al shyǵarmashylyq baǵyttarǵa shyǵarmashylyq emtıhan tapsyrady.

Mınıstrlik konkýrs Ulttyq bilim berý derekter qorynyń aqparattyq júıesi arqyly avtomattandyrylǵan tártippen ótkiziletinin atap ótti.

Aıta keteıik, áskerı IT-mamandar daıarlaıtyn ınstıtýtqa qujat qabyldaý bastaldy.