Qazaqstanda kolledjderde memtapsyrys jasaýdyń jańa erejesi ázirlendi
NUR-SULTAN. QazAqparat – Tehnıkalyq jáne kásiptik bilim berý salasynda memlekettik tapsyrysty qalyptastyrý men ornalastyrýdyń jańa erejesi ázirlendi. Bul týraly QR Bilim jáne ǵylym vıtse-mınıstri Bıbigúl Asylova aıtty, dep habarlaıdy QazAqparat tilshisi.
«Mınıstrlik kadrlar boıynsha ekonomıkanyń orta ári uzaq merzimdegi qajettiginiń boljamyn, óńirlik eńbek naryǵyn jáne jańa kásipter men quzyretterdiń atlasyn eskere otyryp, memlekettik tapsyrysty qalyptastyrý men ornalastýrdyń erejesin ázirledi. Tıisti buıryq Ádilet mınıstrligine tirkeýge joldanǵan», - dedi vıtse-mınıstr Májilistiń Áleýmettik-mádenı damý komıtetiniń keńeıtilgen otyrysynda.
Sonymen qatar ol kolledjderge derbestik usyný máselesine toqtaldy.
«Álemdik ekonomıkanyń damýy men eldiń áleýmettik-ekonomıkalyq damýynda jalpy adamı kapıtal sapasy mańyzdylyǵynyń artýy jaǵdaıynda mınıstrlik kolledjderde jastardy negizgi daǵdylarmen ári quzyrettermen qamtamasyz etýdi maqsat etip qoıdy. Búginde kolledjderge akademııalyq derbestik berýde alǵashqy qadamdardy jasadyq. Bul óz kezeginde bilim berý baǵdarlamalarynyń sapasyn kóteredi», - dedi B. Asylova.
Budan buryn habarlanǵandaı, Bilim mınıstrligi kolledjderde mamandardy daıarlaýdyń problemalaryn atady.
