Qazaqstanda kólikterge qosymsha janarmaı baktaryn zańsyz ornatýdyń 595 deregi anyqtaldy

ASTANA. KAZINFORM – Qazaqstanda jyl basynan beri avtokólikterge qosymsha janarmaı baktaryn zańsyz ornatýdyń 595 deregi tirkeldi. Olardyń jalpy syıymdylyǵy 159,5 tonnany qurady, dep habarlady Polisia.kz.

v
Foto: ІІM

Іshki ister mınıstrligi «Zań men Tártip» qaǵıdaty aıasynda qoǵamdyq qaýipsizdik pen quqyqtyq tártipti qamtamasyz etý jumystaryn jalǵastyryp jatyr. Vedomstvo quqyq buzýshylyqtardyń aldyn alý men azamattardyń qaýipsizdigin qorǵaýdy polıtsııa qyzmetiniń basym baǵyttarynyń biri retinde atap ótti.

5 qazan men 5 qarasha aralyǵynda respýblıka boıynsha «Qaýipsiz úı» jedel-profılaktıkalyq is-sharasy ótkizildi.

Shara barysynda polıtseıler 576 myńnan astam turǵyn úı men ózge de nysandy teksergen. Ásirese jalǵa beriletin páterlerge, saıajaı úılerine, turmysy qolaısyz otbasylarǵa jáne profılaktıkalyq esepte turǵan azamattarǵa erekshe nazar aýdarylǵan.

Nátıjesinde kóshi-qon zańnamasyn buzýdyń 42 myńǵa jýyq dereginiń joly kesildi. 9 myńǵa jýyq sheteldik jaýapkershilikke tartylyp, polıtsııaǵa turaqty turǵylyqty jeri joq 3,5 myńnan astam adam jetkizildi.

Sonymen qatar polıtsııa qyzmetkerleri turǵyndarmen 12 myńnan astam kezdesý ótkizip, profılaktıkalyq mazmundaǵy 398 myńǵa jýyq jadynama taratqan.

Azamattardan 4,5 myńnan astam usynys pen ótinish kelip túsken. Olardyń barlyǵy boıynsha tıisti sharalar qabyldanǵan.

Іs-shara aıasynda 100 myńnan astam qarý ıesi de tekserildi. Nátıjesinde 1,5 myńnan astam quqyq buzýshylyqtyń joly kesilip, tirkelmegen 195 qarý tárkilendi.

Jetisý oblysynda polıtseıler alkogolge áýestigi bar azamatqa emdelýge jáne ómir saltyn ózgertýge kómektesken. Qazir ol jumys istep júr. Al anasy kórsetilgen kómek úshin ýchaskelik polıtsııa ınspektoryna alǵys bildirgen.

Abaı oblysynda ata-analyq mindetterin tıisinshe oryndamaǵan otbasylar anyqtaldy. Balalary beıimdeý ortalyǵyna ornalastyrylyp, ata-analaryna qatysty tıisti sharalar qabyldandy.

ІІM jumysynyń taǵy bir mańyzdy baǵyty – janarmaıdy el aýmaǵynan zańsyz áketý derekteriniń jolyn kesý.

Osy maqsatta memlekettik shekaradaǵy avtokólik ótkizýdiń 48 pýnktiniń mańynda táýlik boıy jumys isteıtin polıtsııa beketteri qoıylǵan.

Jyl basynan beri respýblıka boıynsha qosymsha janarmaı baktaryn zańsyz ornatýdyń 595 deregi anyqtaldy. Olardyń jalpy kólemi 159,5 tonnany qurady.

Quqyq buzýshylyqtardyń basym bóligi Jambyl oblysynda tirkelgen – 386 derek. Túrkistan oblysynda 119, al Qostanaı oblysynda 80 derek anyqtalǵan.

Zań talaptaryn buzǵan júrgizýshiler Ákimshilik quqyq buzýshylyq týraly kodekstiń 590-babynyń 7-bóligi boıynsha ákimshilik jaýapkershilikke tartylyp, olarǵa aıyppul salyndy. Kólikterden zańsyz ornatylǵan qosymsha baktar alynyp tastaldy.

Vandalızm men zańsyz graffıtılerge qarsy kúres te vedomstvo jumysynyń ózekti baǵyttarynyń biri bolyp otyr.

1 qyrkúıekten bastap elimizde 26 myńnan astam zańsyz jazý óshirilgen. 8 myńnan astam adam ákimshilik jaýapkershilikke tartyldy.

Vandalızm jáne esirtki jarnamalaıtyn graffıtıler úshin 7 sotqa deıingi tergep-tekserý bastaldy.

Profılaktıkalyq jumystar aıasynda azamattarmen 43 myńnan astam kezdesý uıymdastyrylyp, 59 myńnan astam aqparattyq broshıýra taratylǵan.

Іshki ister mınıstrligi qorshaǵan ortanyń lastanýynyń aldyn alýǵa baǵyttalǵan keshendi is-sharalardy da júzege asyryp jatyr.

Jyl basynan beri respýblıka boıynsha 47 myńnan astam reıd júrgizilgen. Nátıjesinde 1724 zańsyz qoqys orny anyqtalyp, 351 myńnan astam ákimshilik quqyq buzýshylyqtyń joly kesildi.

Qabyldanǵan sharalardyń nátıjesinde 1435 zańsyz qoqys orny joıyldy.

– Polıtsııa qoǵamdyq qaýipsizdik pen quqyqtyq tártipti qamtamasyz etý baǵytyndaǵy jumystaryn jalǵastyrady. Zań men Tártipti saqtańyzdar! – dep málimdedi Іshki ister mınıstrligi.

Aıta keteıik, buǵan deıin Qazaqstanda qosymsha janarmaı baktaryn zańsyz ornatqan 537 kólik anyqtalǵany habarlanǵan bolatyn. Sol kezde zańsyz ornatylǵan baktardyń jalpy syıymdylyǵy 150 tonnadan asqany aıtylǵan.