Qazaqstanda kólik jóndeý qyzmetiniń quny qansha

ASTANA. KAZINFORM – Kólikti qarap, qosalqy bólshekterin aýystyrý, alys jolǵa daıyndaý qyzmetiniń baǵasy elimizdiń qalalarynda ártúrli. Avtokólik jóndeý sheberleriniń eńbegi qansha ekenin Kazinform agenttiginiń tilshisi anyqtap bildi.

TQS qyzmetiniń quny qansha? Bul óte aýqymdy suraq. Kez kelgen júrgizýshi bul suraqtyń naqty jaýaby bolmaıtynyn anyq túsinedi. Sebebi kólik markasyna qaraı baǵa da túrlenip tur. Kólik neǵurlym baǵaly bolsa, shyǵyn da soǵan saı joǵarylaı beredi. Qyzmet qunyn salystyrý kezinde baǵasy ortasha kólikke eń qajetti tehnıkalyq qyzmet kórsetý joly tańdaldy. Olar: kompıýterlik dıagnostıka (kólikti jóndemes buryn qaı jeri buzylyp turǵanyn bilý kerek), shyǵý-túıisý buryshy (kóliktiń týra júrýi, dóńgelekti «mújip» tastamaýy úshin qajet), tejegish qalyp jubyn aýystyrý (kóbinde jelinip qalady), amortızator tireýin (bireýi) aýystyrý (eger eskirse, kólikti basqarý qıyndaıdy), otaldyrǵysh shamyn (bireýin) aýystyrý (kóliktiń otalýyna qajetti bólshek) jáne dóńgelekti aýystyrý (júrgizýshiler maýsym saıyn aýystyrýy tıis).

Baǵasy eń joǵary qyzmet Atyraý qalasynda bolyp shyqty. Munda kompıýterlik dıagnostıka quny orta eseppen 4 000-7 000, shyǵý-túıisý buryshy – 4 000-6 000, tejegish qalyp jubyn aýystyrý – 5 000-7 000, amortızator tireýin (bireýi) aýystyrý 12 000 teńge jáne odan joǵary, otaldyrǵysh shamyn (bireýin) aýystyrý 2 000-4 000 teńge. Al tórt dóńgelekti montaj, demontaj jáne balans jasaý qyzmetiniń quny – 10 000 teńge. Barlyq qyzmetti qyzmetti qosqanda kólikke tehnıkalyq qyzmet kórsetý ortalyǵyna kem degende shamamen 42 500 teńge kerek.

Bul qyzmet quny Jezqazǵan (41 500), Qonaev (41 000) jáne Taldyqorǵanda (41 000) sál tómen. Degenmen bul da ózge óńirlerge qaraǵanda qyzmet qunynyń joǵary ekenin kórsetedi. Máselen Jezqazǵanda dıagnostıka, al Taldyqorǵanda shyǵý-túıisý buryshy qyzmetiniń quny elimiz boıynsha eń joǵary bolyp tur.

Aqtóbe men Qostanaı qalalarynda baǵa shamalas. Bul qyzmetterdiń quny - 38 750 teńge. Biraq shınomontaj qyzmeti maýsym aýysqan kezinde kóterilip, 7 000-10 000 teńgege, tipti 25 000 teńgege jetýi múmkin.

Elimiz boıynsha Petropavl, Óskemen, Semeı men Qaraǵandyda baǵa ortasha. Kólikke tehnıkalyq qyzmet kórsetý quny shamamen 38 000 teńge. Qazaqstan boıynsha Pavlodar qalasynda tejegish qalyp jubyn aýystyrý qyzmetiniń quny – 8 000 teńge. Bul eń joǵary baǵa.

Tarazda (37 500), Aqtaýda (36 500) jáne Shymkente (35 500) baǵa sál tómen.

Kollaj: Kazinform

Ózge óńirlerge qaraǵanda qarapaıym qyzmet túriniń baǵasy Almaty men Astanada qalalarynda tómen bolyp shyqty. Bir aıta keterligi, Almaty qalasynda otaldyrǵysh shamyn (bireýin) aýystyrý quny elimiz boıynsha qymbat, al Astanada amortızator tireýin (bireýi) aýystyrý qyzmetiniń quny eń arzan bolyp shyqty. Nátıjesinde Almatyda qyzmet quny orta eseppen 34 250 teńge, Astanada 33 500 teńge bolyp shyqty. Kókshetaý (34 000) qalasynda da baǵa osy shamada.

Oralda (32 000) jáne Túrkistanda (29 250) baǵa qoljetimdi. Sonyń ishinde Oral qalasynda shınomontaj baǵasy elimiz boıynsha eń tómen bolyp shyqty.

Pavlodar men Qyzylordada baǵa ózge óńirlerge qaraǵanda tómen. Dıagnostıka baǵasy shamamen 3 000 teńge, shyǵý-túıisý buryshy 5 000 teńge, Pavlodarda tejegish qalyp jubyn aýystyrý 1500 teńge, al Qyzylorda 3 500 teńge. Qyzylordada dıagnostıka baǵasy – 3 000 teńge. Al amortızator tireýin (bireýi) aýystyrý – 6 000-7 500 teńge, otaldyrǵysh shamy – 2 500 teńge, shınomontaj – 6 000-7 500 teńge.

Buǵan deıin avtomobıl nómirleriniń jańa baǵasy jarııalanǵany týraly jazyldy. 

Sondaı-aq qazaqstandyq júrgizýshi kýáliginen elektrondyq chıp alyp tastalady.