Qazaqstanda kólik ınfraqurylymy jańaryp, tranzıt kólemi birneshe esege ósti
ASTANA. KAZINFORM — Qazaqstan Respýblıkasy Parlamenti Senatynda elimizdiń tranzıttik áleýetin arttyrý máseleleri boıynsha Parlamenttik tyńdaýy ótti. Otyrysta Qazaqstan Respýblıkasy Kólik mınıstri Nurlan Saýranbaev kólik-logıstıka salasyn damytý jáne halyqaralyq tranzıttik baǵyttardy keńeıtý boıynsha atqarylyp jatqan jumystar týraly baıandady. Bul týraly Kólik mınıstrligi málim etti.
Mınıstrdiń aıtýynsha, búginde kólik salasynyń barlyq baǵyttary boıynsha júıeli jumystar júrgizilip jatyr. Sońǵy bes jylda salanyń jalpy ónimi úsh esege ósip, ınfraqurylym men logıstıka qarqyndy damyp keledi.
— 2030 jylǵa qaraı temirjol tranzıtiniń kólemin 67 mln tonnaǵa, avtomobıl tranzıtin 12 mln tonnaǵa jáne áýe tranzıtin 487 mln ushaq-shaqyrymǵa deıin jetkizý josparlanyp otyr. Temirjol salasynda sońǵy bes jylda tranzıt kólemi 65%-ǵa artty. Infraqurylymdy jańǵyrtý aıasynda Dostyq — Moıynty temirjol ýchaskesi men Almaty aınalma temirjoly iske qosyldy. 2022–2025 jyldary 509 lokomotıv satyp alyndy. Sonymen qatar Darbaza–Maqtaaral jáne Baqty–Aıagóz temirjol jobalary júzege asyrylýda, sondaı-aq jyl saıyn 1500 shaqyrymǵa jýyq jol jóndelip jatyr, — delingen habarlamada.
Teńiz ınfraqurylymy baǵytynda Aqtaý jáne Quryq porttaryn jańǵyrtý jumystary júrgizilýde. Nátıjesinde olardyń ótkizý qabileti 21 mln tonnadan 30 mln tonnaǵa deıin ulǵaıady.
— Bul Transkaspıı halyqaralyq kólik baǵytynyń áleýetin kúsheıtip, Qazaqstannyń logıstıkalyq hab retindegi rólin arttyrýǵa múmkindik beredi. Avıatsııa salasynda sońǵy 5 jylda tranzıt tórt esege ósti. Qazirgi ýaqytta 2050 jylǵa deıingi avıatsııany damytý jónindegi master-jospar ázirlenýde. Sonymen qatar jańa áýe kemelerin satyp alý jáne avıatsııalyq ınfraqurylymdy jańǵyrtý boıynsha jobalar iske asyrylyp jatyr, — dep habarlady vedomstvodan.
Mınıstrliktiń málimetinshe, halyqaralyq avtomobıl tasymaldary da turaqty ósim kórsetip otyr. 2020 jyldan beri tranzıt kólemi úsh esege artty. Búginde Qazaqstannyń 42 elmen úkimetaralyq kelisimderi bar, bul otandyq tasymaldaýshylarǵa Eýrazııa keńistigindegi kóptegen elderge júk jetkizýge múmkindik beredi.
Salany tsıfrlandyrý jáne ákimshilik rásimderdi jeńildetý aıasynda ruqsat blankilerin berý merzimi 8 kúnnen 1 kúnge deıin qysqartyldy, al blankilerdiń 70%-y elektrondyq formatqa kóshirildi.
Jol ınfraqurylymyn damytý boıynsha elimizde 7 halyqaralyq avtodáliz qalyptastyrylǵan. 2029 jylǵa deıin Aqtóbe — Qyzylorda, Beıneý — Sekseýil, Ortalyq — Batys jáne Qaraǵandy — Jezqazǵan iri jobalary iske asyrylada. 2026 jyly aqyly avtomobıl joldarynyń uzyndyǵy 6,7 myń shaqyrymǵa deıin jetkiziledi. Osylaısha tranzıt elimizdiń strategııalyq aktıvine aınalyp keledi.
Eske sala keteıik, buǵan deıin Kólik mınıstri elimizdiń tranzıttik-kólik áleýetin damytý máseleleri boıynsha keńes ótkizgen edi. Jıyn barysynda kólik salasynyń tıimdiligin arttyrý, ınfraqurylymdyq jobalardy iske asyrýdy jedeldetý, protsesterdi tsıfrlandyrý, sondaı-aq Prezıdent pen Úkimet tapsyrmalarynyń múltiksiz oryndalýyn qamtamasyz etý jónindegi basym mindetter qaralǵan bolatyn. Tranzıt kólemin 55 mln tonnaǵa deıin ulǵaıtý tapsyryldy.
