Qazaqstanda kólik baǵasy tómendeýi múmkin – Ónerkásip mınıstri
ASTANA. KAZINFORM – Ónerkásip jáne qurylys mınıstri Ersaıyn Naǵaspaev elimizde otandyq óndiristiń keńeıýi esebinen avtokólik baǵasynyń tómendeýi kútiletinin málimdedi, dep habarlaıdy Kazinform agenttiginiń tilshisi.
Mınıstrdiń aıtýynsha, 2025 jyldyń qańtar aıyndaǵy statıstıka avtokólik baǵasynyń 105%-ǵa óskenin kórsetken. Al Qazaqstanda óndirilgen kólikter boıynsha ósim 101% deńgeıinde bolǵan.
– Ózderińiz bilesizder, qazaqstandyq zaýyttar jyl saıyn shyǵarylatyn markalar qataryn kóbeıtedi. Jańa markalar naryqqa shyqqan saıyn, baǵalar mindetti túrde tómendeıdi. Muny naqty aıta alamyn. Otandyq avtokólik óndirisiniń artýy qytaılyq kólikterdiń baǵasynyń tómendeýine de áser etedi, – dedi Ersaıyn Naǵaspaev.
Buǵan deıin Kazinform agenttigi 2026 jyly jeńil avtokólikterdi ımporttaý jáne kedendik rásimdeý tártibi, qosymsha salyqtar men tirkeýge deıingi negizgi talaptar týraly jazǵan bolatyn.