Qazaqstanda kólikti baqylaý tolyǵymen qashyqtyqtan basqarý túrine ótedi
NUR-SULTAN. QazAqparat - QR Indýstrııa jáne ınfraqurylymdyq damý mınıstrligi kóliktik baqylaýdy tolyǵymen qashyqtyqtan basqarý túrine ótýdi josparlap otyr, dep habarlaıdy QazAqparat mınıstrliktiń baspasóz qyzmetine silteme jasap.
Mundaı sheshim Indýstrııa jáne ınfraqurylymdyq damý vıtse-mınıstri Berik Kamalıevtiń tóraǵalyǵymen ótken kóliktik baqylaý salasyndaǵy sybaılas jemqorlyq táýekelderin boldyrmaý úshin usynystar ázirleý jónindegi jumys tobynyń ekinshi otyrysy kezinde qabyldandy.
Otyrys barysynda avtojoldardyń jekelegen ýchaskelerinde salmaq gabarıtin ólsheýdiń avtomattandyrylǵan stansalaryn qurý arqyly kóliktik baqylaýdyń qashyqtyqtan basqarý nysanyna tolyqtaı kóshý týraly másele qaraldy.
Sonymen qatar, jolaýshylar poıyzdarda bıletsiz júretinderdi anyqtaý boıynsha máseleler talqylandy, degenmen bunyń ózi qozǵalys qaýipsizdigine áser etpeıtin bolǵandyqtan, QR IIDM Kólik komıteti «QTJ» UK» AQ aqparattyq júıesin paıdalaný máselesi temirjol kóligindegi qozǵalys qaýipsizdigine baqylaýdy kúsheıtýge, sondaı-aq sybaılas jemqorlyq táýekelin tómendetý arqyly kásipkerlerdi tekserý sanyn qysqartýǵa múmkindik beredi.
Sondaı-aq, shaǵyn ólshemdi kemelerdi qaýipsiz paıdalanýdy qamtamasyz etý boıynsha memlekettik baqylaý jáne qadaǵalaý fýnktsııalaryn basqa ýákiletti memlekettik organdarǵa berýdi qosymsha talqylaý týraly sheshim qabyldandy.
Otyrysqa memlekettik qyzmet isteri jáne sybaılas jemqorlyqqa qarsy is-qımyl agenttiginiń, ІІM, Qarjy mınıstrliginiń, Mınıstrliktiń qurylymdyq bólimsheleriniń, «Atameken» UKP, QTJ, sondaı-aq salalyq qaýymdastyqtardyń ókilderi qatysty.
Eske sala ketsek, elimizde qalalarǵa kire beristegi polıtsııa beketteri alynyp tastalady.
