Qazaqstanda kólikterdiń 167 modeli shyǵarylýda
NUR-SULTAN. QazAqparat – QR Aqparat jáne qoǵamdyq damý mınıstri Dáýren Abaev Qazaqstanda satylǵan avtokólikterdiń árbir ekinshisi otandyq kásiporyndardan shyǵarylǵan, dep habarlaıdy QazAqparat tilshisi.
«Álemdik ekonomıkalyq qıyn jaǵdaılardyń qalyptasýyna baılanysty Prezıdent Qasym-Jomart Kemeluly daǵdarysqa qarsy sharalar paketin qabyldaýdy tapsyrdy. Ol sharalar týraly Úkimet te, Úkimet basshysy Asqar Uzaqbaıuly da birneshe márte aıtqan bolatyn», - dedi Dáýren Abaev «Ashyq dıalog» baǵdarlamasynda.
Dáýren Abaev osy sharalardyń negizgilerine toqtalyp ótti.
«Basty basymdyq – jumyspen qamtý, jumys oryndaryn saqtap qalý. Máselen bizdiń eldegi taý-ken keshenderi men jalpy óńdeý ónerkásibinde 700 myń adam jumys isteıdi. Olardyń birde-biri jumysyn joǵaltpaıdy. Qurylys salasynda kerisinshe jumys aýqymyn 20 mln sharshy metrge kóbeıtý kózdelgen. Osynyń arqasynda jumys oryndary saqtalyp qana qoımaı, qosymsha ashylatyn da bolady. Óte mańyzdy másele: josparlanǵan joldardyń bári de bıyl qoldanysqa beriledi», - dedi ol.
Dáýren Abaev munaı baǵasynyń quldyrap ketkenin, alaıda qazirgi jaǵdaıda memleket úshin onyń baǵasy emes, jumys oryndaryn saqtap qalý mańyzdyraq ekenin jetkizdi.
«Sebebi munaı-gaz salasynda 1500-ge tarta kompanııa jumys isteıdi. Ol 100 myńdaǵan jumys oryny degen sóz. Indýstrııalandyrý baǵdarlamasy qansha márte synǵa ushyraǵany esińizde bolar. Indýstrııalyq damý baǵdarlamasy bastalǵaly beri 1300-ge tarta joba ashyldy. Olarda 250 myń adam jumys isteýde. Osynyń arqasynda bıyl mashına quraý deńgeıi 20 paıyzǵa, jeńil ónerkásip 8 paıyzǵa artty. Mundaı kórsetkishterimiz jeterlik. Óńdeý ónerkásibindegi jıyntyq óndiristiń kólemi ındýstrıalızatsııa jyldarynda 71 trln teńgege jetti. Qazaqstanda teplovoz, avtobýs, vagon, júk tasymaldaý kemeleri, mobıldi-burǵylaý keshenderi, motorly maılar, radıatorlar shyǵaryla bastady», - dedi ol.
Mınıstrdiń aıtýynsha Qazaqstanda qazir kólikterdiń 167 modeli shyǵarylýda.
«Búgingi tańda Qazaqstanda satylǵan árbir ekinshi avtokólik otandyq óndiriske tıesili. Buryn Qazaqstannyń avtokólik salasyndaǵy talap-tilegine bireýler kúletin. Ondaılar bul jaı ǵana quralǵan kólikter deıtin. Biraq Qostandaı qazir usaq ýzeldik quraý jumystary da bastalyp ketti. Bul baǵyttaǵy jumys jalǵasyn tabady», - dedi mınıstr.
