Qazaqstanda kólikke jarnama ornalastyrý edáýir jeńildetilmek
ASTANA. QazAqparat - Qazaqstanda kólik quraldaryna jarnama ornalastyrýǵa arnalǵan ruqsat qujattary azaıtylady. Mundaı jańalyqtar «QR Ruqsat berý qujattary men ruqsat berý protsedýralaryn qysqartý máseleleri jónindegi keıbir zańnamalyq aktilerge ózgertýler men tolyqtyrýlar engizý týraly» jańa zań jobasy aıasynda engiziledi dep kútilýde.
«Mysaly, kólik quraldaryna jarnama ornalastyrý úshin buryn tıisti ruqsat qujattaryn alý kerek bolǵan bolsa, zań jobasy qabyldanǵannan keıin ol qysqartylady», - deıdi QR Ulttyq ekonomıka vıtse-mınıstri Tımýr Jaqsylyqov.
Onyń sózine qaraǵanda, qazirgi ýaqytta kólikke jarnama ornalastyrý úshin kásipkerler úlken mashaqatty jumystardy atqarýy tıis. Máselen, jeke kásipker retindegi tirkeý qaǵazyn, ózge de notarıaldyq turǵyda rastalǵan qujattardy jınaýy tıis, sonymen qatar bıýdjetke jarna tólep, ruqsattyń berilýin belgili bir ýaqyt tosýy kerek bolady. Onyń sózi boıynsha, jańa zań aıasynda endi kásipkerler tıisti organǵa eskertý jasasa da jetkilikti. Onyń ústine, kásipkerler eskertý jasaǵan tustan bastap, jarnamany ornalastyrýǵa quqyly. Eske sala keteıik, QR Ulttyq ekonomıka mınıstrligi «QR Ruqsat berý qujattary men ruqsat berý protsedýralaryn qysqartý máseleleri jónindegi keıbir zańnamalyq aktilerge ózgertýler men tolyqtyrýlar engizý týraly» jańa zań jobasyn Parlament májilisine tanystyrdy.
