Qazaqstanda kólik júrgizýshilerin onlaın oqytý joıylmaq

ASTANA. QazAqparat – QR Іshki ister mınıstrliginiń Ákimshilik polıtsııa komıteti júrgizýshi kýáligin berý talaptaryna túzetýler engizbek, dep habarlaıdy QazAqparat tilshisi.

«Ashyq NQA» portalynda qoǵam talqylaýyna usynylǵan qujat jobasynda mehanıkalyq kólik quraldarynyń júrgizýshilerin daıarlaý, emtıhandardy qabyldaý jáne júrgizýshi kýálikterin berý jónindegi qaǵıdalaryna tıisti ózgeris engizý eskerilgen. Qujatty talqylaý 24 naýryzǵa deıin jalǵasady.

Atap aıtqanda, qazir teorııalyq oqytýdy onlaın tártipte júrgizýge múmkindik bar. Endi bul saladaǵy oqytý sapasyn kóterý maqsatynda tıisti ózgeris qarastyrylǵan.

«Oqytý sapasyn arttyrý maqsatynda onlaın jáne qashyqtan oqytý nysandary joıylady», - delingen qujat jobasynda.

Usynylǵan jańa redaktsııada árbir pán boıynsha teorııalyq sabaqtar kúnine eki saǵattan, al praktıkalyq sabaqtar alty saǵattan aspaıtyndaı josparlanatyny jazylǵan.