Qazaqstanda kólik júrgizýshi áıelder bir aıda 14 balany qaǵyp, 3 balany mert qyldy
ASTANA. QazAqparat - Qazaqstanda mamyr aıynda kólik júrgizýshi áıelder birneshe jol-kólik oqıǵalasyn jasap, birneshe balany qaǵyp ketti. Ókinishtisi, jol júrý erejesiniń óreskel buzylýynan kólik astynda qalǵan 3 bala mert boldy.
Almaty, Astana, Óskemen qalalarynda tek sońǵy alty kún ishinde áıelder úsh birdeı qaıǵyly jol kólik oqıǵasyn jasady.
Almatyda «Qalqaman» shaǵynaýdanynda 2 mamyr kúni keshke jaqyn 34 jastaǵy almatylyq áıel mas kúıinde kólik basqaryp, 15 jastaǵy qyzdy, arbadaǵy 4 aılyq balany qaǵyp ketti. Sábı shetinep, qyzdyń aıaǵy synǵan. ІІD habarlaýynsha, áıel oqıǵa ornynan iz sýytpaq bolǵan.
20 mamyr kúni Almatyda búkil qazaqstandyqtardyń janyn túrshiktirgen oqıǵa boldy. 46 jastaǵy áıel «Toıota Lend Krýzer» kóligimen balabaqsha balalary oınap otyrǵan alańqaıdy soǵyp, 5 jasar balany basyp ketti. Kólik astynda qalǵan bala mert boldy. Al jaralanǵan 9 sábı aýrýhanaǵa jetkizildi. ІІD kólik júrgizýshisi ustalǵanyn habarlady. Osy oqıǵadan halyq es jıyp úlgermesten, 25 mamyr kúni Astana qalasynda saǵat 12 shamasynda 32 jastaǵy áıel basqarýyndaǵy «Toyota Land Cruiser Prado» markaly kóligimen 11 jastaǵy balany jaıaý júrginshi jolaǵynda qaǵyp óltirdi. Oqıǵaǵa kináli áıeldiń júkti ekeni anyqtaldy. Óskemen qalasynda 25 mamyr kúni jas kelinshek 10 jastaǵy balany qaǵyp ketti. Jetkinshek qazirgi ýaqytta bas súıeginiń zaqymdanýy, mı shaıqalý dıagnozdarymen aýrýhanada jatyr. Bul jaǵdaıda da áıel oqıǵa ornynan qashyp ketken.
