Qazaqstanda kólik júrgizýge ózdiginen daıyndalý quqyǵynan bas tartý usynyldy
ASTANA. QazAqparat - «Jol qozǵalysy týraly» jańa zań jobasyna túzetýlerde emtıhandarǵa óz betinshe daıyndalyp, júrgizýshi kýáligine tapsyrý quqyǵyn joıý usynylǵan. Bul usynystar búgin Májiliste qaraldy, dep habarlaıdy QazAqparat.
«Zań jobasynda kórsetilgen túzetýler júrgizýshilerdiń óz betinshe jáne de jekeleı daıyndyǵynan bas tartýdy kózdeıdi»,-dedi QR ІІM Ákimshilik polıtsııa komıteti Memlekettik avtomobıl ınspektsııasy basqarmasynyń basshysy Murat Imanbaev zań jobasyna túzetýlerdi talqylaý jónindegi jumys tobynyń otyrysynda.
ІІM ókili eske salyp ótkendeı, 2016 jyldyń sáýirinde emtıhandar men júrgizýshilik kýálikterdi berý erejeleri boıynsha vedomstvolyq buıryqqa ózgertýler engizildi. Osy oraıda «AA1» jáne «VV1» sanattary boıynsha, ıaǵnı jeńil avtokólikter men mototsıkl júrgizý quqyǵyn alýǵa óz betinshe daıyndalýǵa qatysty múmkindikter eskerilgen.
«Túzetý tıisti eskertpemen qabyldandy. Óz betinshe daıyndalýǵa tek arnaıy HQKO-larda ǵana jol beriledi. Bul turǵyda kez kelgen adamı faktorǵa jol bermeıtindeı avtomattandyrylǵan avtodromdar bolýy tıis»,-dedi Imanbaev.
Aıta keteıik, mototsıkl men jeńil kólikti basqarýǵa arnalǵan kýálikti alýǵa úmitker júrgizýshilerdiń óz betinshe daıyndalýy boıynsha norma 2016 jyldyń 7 shildesinde kúshine endi.
Májilis depýtaty Qanat Mýsınniń sózinshe, atalǵan jańashyldyq azamattar tarapynan synı kózqarasty týdyrdy.
«Júrgizýshilikke úmitkerlerdiń óz betinshe daıyndalýy sapasy búginde shynymen de joǵary deńgeıde emes. ІІM dereginshe, ótken jyly bul normanyń kúshine engeninen bastap 2017 jyldyń 1 qańtaryndaǵy jaǵdaı boıynsha jekeleı daıyndalǵan 2800 júrgizýshilikke úmitkerlerdiń arasynan tek 20 paıyzy ǵana kýálikterin alýǵa qaýqarly boldy. Al júrgizýshilik kýrstaryn támamdaǵandar, ıaǵnı bul turǵyda jylyna 500 myńnan kem emes adamnyń arasynda 50 paıyz jaǵdaıda kýálikterin alady»,-dedi depýtat.
Osyǵan baılanysty depýtattar «Jol júrisi týraly» zańnamanyń 74 baby 1 tarmaǵyna ózgertý engizip, kólikti basqarýǵa kýálik alýǵa emtıhanǵa ótý úshin avtomektepterdegi oqýǵa qatysýdy mindetti talap retindegi usynysty eskerip otyr.
