Qazaqstanda kólik satylymy 18%-ǵa artty
ASTANA. QazAqparat - 2015 jyldyń aqpan aıyndaǵy qorytyndy boıynsha resmı dılerler 9 194 kólikti satty. Bul qańtar aıyndaǵy kórsetkishten 1399 avtomobılge artyq. Ósim 17,95%-dy qurady.
Jyl basynan beri 16 989 avtomobıl satyldy, dep habarlady Qazaqstannyń avtobıznes qaýymdastyǵynyń (QABQ) baspasóz qyzmetinen.
QABQ sarapshylary satý deńgeıiniń ulǵaıýyn avtosalondardaǵy baǵanyń tómendeýimen baılanystyrady. Kóptegen resmı dılerler klıentterine 10%-dan 50%-ǵa deıin jeńildik, kólikti jóndeý boıynsha birneshe jyldyq tegin qyzmet kórsetý, aqshasyn bólip tóleý syndy usynystar jasap jatyr.
Avtodılerlerdiń bul sharalarynyń arqasynda PC, SUV, MPV, PU segmentindegi jeńil kóliktiń ortasha quny aqpan aıynda 26% arzandap, $18 817 qurady. Qańtarda $25 384 bolǵan edi. Sol qańtar aıynda shamamen $25 000 - $40 000 satylǵan temir tulparlar jeńildikterdiń arqasynda 28%-ǵa arzandady.
QABQ pikirinshe, QR Úkimeti qolǵa alyp jatqan sharalary kóliktiń satylýyna jaqsy múmkindikter týdyrady. Sonyń ishinde jeke jáne zańdy tulǵalardyń otandyq avtomobılderdi satyp alýy úshin olarǵa sáıkesinshe 6% jáne 4% paıyzdyq mólsherlememen nesıe berý úshin ekinshi deńgeıli bankterge 20 mlrd. teńge qarajat bólý sharasy otandyq kólikterdiń satylýyna oń áser etpek.
