Qazaqstanda kólik salyǵyn tóleý merzimi ózgertiledi

NUR-SULTAN. QazAqparat – 2020 jyldan bastap kólik salyǵy ár jyldyń sáýir aıyna deıin tólene bastaýy múmkin. Bul týraly búgin Ortalyq kommýnıkatsııalar qyzmetinde ótken baspasóz máslıhatynda QR Qarjy mınıstrligi Memlekettik kirister komıteti Salyq salý ádisnamasy departamenti dırektorynyń mindetin atqarýshy Dáýlet Jarylǵasynov málim etti, dep habarlaıdy QazAqparat tilshisi.

«Jeke tulǵalardyń kólik quraldary úshin salyq tóleý merzimin aýystyrý máselesi pysyqtalyp jatyr. Atap aıtqanda, bul eń aldymen, salyqtyń ýaqytyly túsimin qamtamasyz etý úshin jasalyp jatqan qadam. «Qazaqstan Respýblıkasynyń keıbir zańnamalyq aktilerine salyq salý máseleleri boıynsha ózgerister men tolyqtyrýlar engizý týraly» zań jobasymen jeke tulǵalardyń kólik quraldaryna salynatyn salyqty tóleý merzimin 31 jeltoqsannan 1 sáýirge aýystyrý qarastyrylýda», - dedi Dáýlet Jarylǵasynov.

Departament ókiliniń aıtýyna qaraǵanda, atalmysh usynys zań normalary kúshine engennen soń kelesi jyldan bastap qoldanysqa enedi.

Al baspasóz máslıhatynan keıin tilshilerdiń suraǵyna jaýap bergen QR QM MKK Salyq salý ádisnamasy departamentiniń Óndiristik emes tólemder boıynsha basqarma basshysynyń mindetin atqarýshy Darhan Beısenálıev bul ózgeristiń nelikten engizilip jatqanyn túsindirdi.

«Jalpy, salyq zańnamasyna saı, kólik salyǵy ár jyldyń 31 jeltoqsanynda tólenýi kerek. Kelesi jyldan bastap ony 1 sáýirden bastap tóletýdi josparlap otyrmyz. Nelikten? Sebebi, biz bıýdjettiń tórtinshi deńgeıine ótemiz. ıAǵnı, aýyldyń okrýg ákimderi kólik salyǵynan túsken aqshany sol jyly ıgere alatyndaı jaǵdaı jasaýdy surap otyr. Osy maqsatta tólem qurylymyn ózgertip jatyrmyz. ıAǵnı, salyq jyl sońynda emes, kelesi eseptik kezeńde jyl basynda túsedi», - dedi ol.