Qazaqstanda kólik salyǵyn tóleý merzimi ózgeredi

NUR-SULTAN. QazAqparat – Kólik salyǵyn tóleý merzimi aýystyrylady. Bul týraly Parlament Májilisiniń jalpy otyrysynda Ulttyq ekonomıka mınıstri Rýslan Dálenov málim etti, dep habarlaıdy QazAqparat tilshisi.

«Salyq tóleýshilerge qolaıly bolý maqsatynda kólik salyǵyn tóleý merzimin bıylǵy 31 jeltoqsanynan kelesi jyldyń 1 sáýirine aýystyrý usynylady», - dedi mınıstri tıisti zań jobasyn talqylaý kezinde.

Budan buryn habarlanǵandaı, búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine salyq salý jáne ınvestıtsııalyq ahýaldy jetildirý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.

Salyq elementterin (salyq salý obektisi, salyq bazasy, mólsherlemesin, esepteý jáne tóleý tártibin) ózgertpeı jeke tulǵalardyń múlik jáne jer salyqtaryn biriktirý usynylady, 2 salyq biryńǵaı tólemmen tólenedi. Bul rette, kóppáterli turǵyn úılerdiń ıeleri úshin jer salyǵyn alyp tastaý usynylady.

Eske sala keteıik, bıyl naýryz aıynda halyqqa qolaıly etý maqsatynda kólik quraldary salyǵyn tóleý merzimin aýystyrý qarastyrylyp otyrǵandyǵy habarlanǵan edi.

Qazir salyq jyl sońyna deıin tólenedi. Endi kelesi jyldyń 1 sáýirine deıin tóleý usynyldy.