Qazaqstanda kólik qurastyrý kólemi artyp keledi
ASTANA. QazAqparat - Qazaqstannyń mashına jasaý salasy bir jyldyń ishinde ónim óndirý kólemin 44 paıyzǵa arttyrdy. Sonyń basym bóligi avtomobıl qurastyrý óndirisine tıesili, dep habarlaıdy QazAqparat tilshisi energyprom.kz saıtyna silteme jasap.
Resmı málimetke sáıkes, jarty jyldyń ishinde mashına jasaý kásiporyndary 409,7 mlrd teńgeniń ónimin shyǵardy. Ótken jyldyń dál osy kezeńimen salystyrǵanda, atalǵan kórsetkish 44 paıyzǵa artyq. Osy salada úsh oblys jaqsy nátıjege qol jetkizdi. Birinshi orynda - Qaraǵandy oblysy. Ol jerde 57,8 mlrd teńgeniń ónimi shyǵaryldy. Odan keıin Almaty (50,5 mlrd tg, +22,2 paıyz) men Shyǵys Qazaqstan oblysy (47,3 mlrd tg, +31,4 paıyz) keledi.
«Qazavtoónerkásip» odaǵynyń tóraǵasy Oleg Alferovtiń aıtýynsha, jyldyń aıaǵyna deıin otandyq avtomobılderdi qurastyrý kólemi 15 myń mashınaǵa deıin jetýi ábden múmkin. Atalǵan kórsetkish ótken jylmen salystyrǵanda 36 paıyzǵa artyq bolmaq. Jalpy, búginde mashına jasaý salasynyń barlyq segmentterinde ósim baıqalyp otyr.
