Qazaqstanda kólik ımporty azaıdy
ASTANA. QazAqparat - Qazaqstanda otandyq avtokólikterge suranys kóbeıip, jeńil kólikter ımporty báseńdedi, dep habarlaıdy ranking.kz.
Bıyl alǵashqy toqsanda Qazaqstanǵa 3697 dana avtomobıl ákelindi. Bul 2016 jyldyń dál osy kezeńimen salystyrǵanda 4% ǵana joǵary (3544 dana).
Qazaqstanǵa sheteldik avtomobılder ımporttaý deńgeıi báseńdep, otandyq avtoónerkásiptegi shyǵarylym qarqyny ulǵaıyp keledi - 2017 jyldyń qańtar-naýryz aılarynda elimizde 3095 dana jeńil avto shyǵarylǵan. Bul 2016 jylmen salystyrǵanda 7,2 esege kóp (428 dana).
2015 jyldyń sáýir aıynda Qazaqstanda qurastyrylǵan jeńil avtokólikterdi alǵysy kelgen jeke tulǵalardy jeńildikpen kredıtteý baǵdarlamasy iske qosyldy. Qazaqstan Damý banki otandyq óndirýshilerge qoldaý kórsetý maqsatynda ekinshi deńgeıli bankterge 2 transh bóldi.
Jeńildikpen nesıeleýge transhtardy ıgerý boıynsha kósh basynda Eýralııalyq bank tur, 2017 jyldyń 13 sáýirine deıin 9,11 mlrd teńge somasyna zaımder berildi. Odan keıingi orynda Sberbank - 7,88 mlrd teńge jáne úshtikti Halyq bank túıindeıdi - 6,86 mlrd teńge. Berilgen zaımderdiń jalpy sany 8,67 myńdy, jalpy somasy 32,75 mlrd teńgeni quraǵan.
Ekinshi deńgeıli bankter úshin jeńildikpen kredıtteý baǵdarlamasy boıynsha nesıeleý tártibi birdeı. Avtomobıldi saqtandyrý jáne kepilge rásimdeý shyǵyndaryn qosqanda 1 avtomobıl quny 15 mıllıon teńgeden aspaýy kerek, kredıtteý merzimi - 7 jylǵa deıin, nomınaldy syıaqy mólsherlemesi - 4 % deıin, tıimdi stavka 7,5% aspaýy shart.
