Qazaqstanda kóleńkeli ekonomıkaǵa qarsy is-qımyl aıasynda qarjy monıtorıngi sýbektileriniń tizbesi keńeıtiledi
ASTANA. QazAqparat - Búgin Parlament Májilisi «Qazaqstan Respýblıkasynyń keıbir zańnamalyq aktilerine qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.
Qujat el prezıdentiniń tapsyrmasyn oryndaýǵa baǵyttalǵan jáne Qylmystyq jolmen alynǵan kiristerdi zańdastyrýǵa jáne terrorızmdi qarjylandyrýǵa qarsy is-qımyl jónindegi Eýrazııalyq toptyń usynymdary boıynsha ulttyq zańnamany jetildirýdi kózdeıdi. Bunda Aqshany jylystatýǵa jáne terrorızmdi qarjylandyrýǵa qarsy kúrestiń qarjylyq sharalaryn ázirleıtin toptyń usynymdary da qaralyp otyr.
Qujat aıasynda kóleńkeli ekonomıkaǵa qarsy is-qımyl jasaý maqsatynda qarjy monıtorıngi sýbektileriniń tizbesin keńeıtý qarastyrylady. Qarjy mınıstri Baqyt Sultanovtyń aıtýynsha, halyqaralyq standarttarǵa sáıkes, Qazaqstan qarjylyq qyzmetter kórsetetin barlyq tulǵalardy qarjy monıtorıngi júıesimen qamtý qajet. Osyǵan baılanysty, tizimge qarjy monıtorınginiń 3 sýbektisi qosylady: býhgalterlik uıymdar men kásibı býhgalterler, mıkroqarjylyq uıymdar, bank bolyp tabylmaıtyn elektrondyq aqsha júıeleriniń operatorlary.
Budan bólek, zań jobasynda qylmystyq jolmen alynǵan kiristerdi zańdastyrý men terrorızmdi qarjylandyrýdyń aldyn alý jónindegi tásilderdi jetildirý qarastyrylǵan.
