Qazaqstanda kóleńkeli ekonomıka 19 % deńgeıinde

ASTANA. QazAqparat - QR Premer-Mınıstriniń orynbasary – qarjy mınıstri Erulan Jamaýbaevtyń tóraǵalyǵymen Kóleńkeli ekonomıkaǵa qarsy is-qımyl jónindegi 2021-2023 jyldarǵa arnalǵan is-sharalar josparynyń oryndalý barysy qaraldy. Bul týraly QazAqparat Úkimet saıtyna silteme jasap habarlaıdy.

Memleket basshysy Úkimet pen Qarjylyq monıtorıng agenttiginiń aldyna 2025 jylǵa qaraı kóleńkeli ekonomıkany 15%-ǵa deıin tómendetý týraly strategııalyq mindet qoıǵan bolatyn. Keshendi jospardy iske asyrý aıasynda 64 is-sharanyń 45-i nemese jospardyń 70%-y oryndaldy.

Aıta ketý kerek, 2021 jyly el boıynsha kóleńkeli ekonomıka deńgeıi 19,75%-dy qurady, boljam 21,5% bolǵan.

Erulan Jamaýbaev memlekettik organdar men uıymdarǵa Kóleńkeli ekonomıkaǵa qarsy is-qımyl jónindegi keshendi jospar is-sharalarynyń oryndalýyn qamtamasyz etýdi tapsyrdy. Kelispeýshilikter hattamasyn tıisti merzimde qarap, Kóleńkeli ekonomıkaǵa qarsy is-qımyl jónindegi 2023-2025 jyldarǵa arnalǵan keshendi jospardyń jobasyn kelisý qajet.

Sonymen qatar Qarjylyq monıtorıng agenttigi múddeli memlekettik organdarmen birlesip, tıisti merzimde Úkimet Apparatyna 2023-2025 jyldarǵa arnalǵan keshendi jospardyń kelisilgen jobasyn engizýge tıis.