Qazaqstanda qolaısyz eńbek jaǵdaıynda qansha adam jumys isteıdi
«Zııandy jáne basqa da qolaısyz eńbek jaǵdaılarynda jumys isteıtin qyzmetkerlerdiń sany týraly aqparatty alý maqsatynda QR Strategııalyq josparlaý jáne reformalar agenttiginiń Ulttyq statıstıka bıýrosy ekonomıkalyq qyzmettiń jekelegen túrlerindegi kásiporyndar men uıymdarǵa jyl saıyn zertteý júrgizedi. Zertteýde aýyl, orman jáne balyq sharýashylyǵy, ónerkásip, qurylys, kólik jáne baılanys, densaýlyq saqtaý jáne halyqqa áleýmettik qyzmet kórsetý, ǵylym jáne qyzmet kórsetý salasyndaǵy kásiporyndar qamtylady», - delingen bıýro aqparatynda.
Vedomstvo málimetinshe, zertteý nátıjesinde sanıtarlyq-gıgıenalyq talaptarǵa (normalarǵa) saı kelmeıtin jaǵdaılarda 366,9 myń adam nemese zerttelgen kásiporyndaǵy qyzmetkerlerdiń jalpy sanynyń 22,3 paıyzy jumys isteıtindigi anyqtalǵan. Onyń ishinde shýdyń jáne dirildiń joǵary deńgeıi jaǵdaıynda 169,8 myń adam, ShUK-dan (shekteýli uıǵaryndy kontsentratsııadan) asatyn jumys aımaǵyndaǵy aýanyń gazdanýy men shańdanýy áserinde – 119,7 myń adam, qolaısyz temperatýralyq rejımde – 62,2 myń adam, basqa qolaısyz faktorlarda – 15,2 myń adam eńbeketken. Aýyr dene eńbegimen shuǵyldanatyn qyzmetkerler sany - 94,3 myń adam.
2020 jyly kásiporyndar (uıymdar) zııandy jáne basqa da qolaısyz eńbek jaǵdaılaryndaǵy jumysy úshin ótemaqylar men jeńildikterge 141 545,8 mln teńge jumsady. Qosymsha demalys (jeńildiktiń túri) 520,6 myń adamǵa berildi. Zııandy jáne jáne basqa da qolaısyz eńbek jaǵdaıyna ártúrli materıaldyq qosymsha tólemderdi 392,1 myń adam paıdalandy. 322,9 myń adam sút nemese teń baǵaly taǵam ónimderin tegin aldy. 79,8 myń adam tegin emdik-profılaktıkalyq tamaqtanýmen qamtamasyz etildi. Al 47,1 myń adam qysqartylǵan jumys kúni rejıminde jumys istedi.
