Qazaqstanda qolaısyz aýa raıy taǵy birneshe kúnge sozylady
ASTANA. QazAqparat - Qazaqstanda qolaısyz aýa raıy taǵy birneshe kúnge jalǵasady, dep habarlaıdy QazAqparat Qazgıdrometke silteme jasap.
Sınoptıkterdiń málimetterine qaraǵanda, 25 mamyr kúni Qostanaı oblysynyń keı jerlerinde naızaǵaı oınap, daýyl soǵady, burshaq jaýýy múmkin, jel sekýndyna 17-22 metr jyldamdyqpen esedi.
Juma kúni Aqmola oblysynyń keı jerlerinde ońtústik-batystan, batystan soqqan jeldiń jyldamdyǵy 15-20 m/s aınalasynda bolady, naızaǵaı jarqyldap, daýyl soǵady, burshaq jaýýy múmkin.
Astanada da oqta-tekte naızaǵaı jarqyldaýy múmkin, kúndiz ońtústik-batystan, batystan soqqan jeldiń ekpini 15-20 m/s-qa deıin jetedi, burshaq jaýýy yqtımal.
24 mamyr kúni kúndiz Mańǵystaý oblysynyń keı aýdandarynda jeldiń jyldamdyǵy sekýndyna 15-20 metrge deıin jetip, shańdy daýyl turýy múmkin.
