Qazaqstanda kókjótel 8 ese azaıdy - Sanepıdbaqylaý komıteti
ASTANA.KAZINFORM- Elde kókjótelge shaldyqqandar sany byltyrmen salystyrǵanda aıtarlyqtaı tómendedi. Dárigerler muny ýaqytyly vaktsınatsııanyń nátıjesi dep atap, ata-analardy ekpeni keshiktirmeýge shaqyrady.
Jibek Joly telearnasyndaǵy «Bugin LIVE» baǵdarlamasynda QR Densaýlyq saqtaý mınıstrligi Sanıtarııalyq-epıdemıologııalyq baqylaý komıtetiniń bas sarapshysy Madına Orysbaeva kókjótel ınfektsııasynyń taralýy men aldyn alý sharalary týraly túsindirdi.
Mamannyń aıtýynsha, kókjótel – joǵary tynys joldarynyń shyryshty qabatyn zaqymdaıtyn, uzaqqa sozylatyn aýyr jótelmen sıpattalatyn qaýipti ınfektsııa.
- Kóp jaǵdaıda bul aýrý qulaqtyń isinýine, pnevmonııaǵa, tipti ólim-jitimge ákelýi múmkin. Saqtanýdyń eń tıimdi joly – ýaqytyly vaktsınatsııalaý, - dedi Madına Orysbaeva.
Qazaqstanda kókjótelge qarsy ekpe kestesi Úkimet qaýlysymen bekitilgen. Vaktsına 2, 3, 4 jáne 18 aıynda, sondaı-aq 6 jasta revaktsınatsııa túrinde júrgiziledi.
Epıdemıologııalyq jaǵdaı byltyrmen salystyrǵanda jaqsarǵan. 2024 jyly 3 myńnan astam jaǵdaı tirkelse, bıyl 11 aı qorytyndysy boıynsha 388 adam ǵana aýyryp, kórsetkish 8 ese tómendedi. Onyń 381-i – 14 jasqa deıingi balalar, al naýqastardyń basym bóligi, ıaǵnı 87%-y - 5 jasqa deıingiler.
- Kókjótel jaǵdaılarynyń 90%-y vaktsına almaǵan balalar arasynda tirkelip otyr. Kóp ata-ana túrli sebeppen ekpeden bas tartady. Al aýrýdyń alǵashqy belgileri JRVI-ge uqsas, túnde kúsheıetin aýyr jótelmen jalǵasady, - dedi komıtet ókili.
Dáriger ata-analardy alǵashqy sımptomdar baıqalǵanda balalardy óz betimen emdemeı, mindetti túrde dárigerge júginýge shaqyrdy. Sondaı-aq tek tekserilgen aqparat kózderine sený mańyzdy.
Árbir ata-ana QR DSM resmı saıty, e-gu.kz platformasy jáne 7701 qysqa nómirli «ystyq jeli» arqyly senimdi aqparat ala alady
Aıta keteıik, buǵan deıin Batys Qazaqstanda kókjótelmen aýyrǵan 18 balanyń deni ekpe almaǵanyn jazǵan edik.