Qazaqstanda qoqys órteýden elektr qýatyn óndiretin 6 keshen salynady
Bul týraly QR Ekologııa, geologııa jáne tabıǵı resýrstar mınıstri Maǵzum Myrzaǵalıev málimdedi.
«Qoqysty órteý arqyly elektr energııasyn alyp, elektr jelilerine jiberedi. Bul joba polıgondarǵa kómiletin qoqys kólemin aıtarlyqtaı qysqartyp, salaǵa ınvestıtsııa tartýǵa múmkindik beredi. Joba boıynsha 6 pılottyq qoqys órteıtin keshen salý qarastyrylǵan», - dedi mınıstr QR Parlamenti Senatynda «Turmystyq jáne ónerkásiptik qaldyqtardy jınaý jáne óńdeý» taqyrybyndaǵy Úkimet saǵatynda.
Onyń aıtýynsha, 2025 jylǵa deıin termııalyq joıý úlesin 30% jetkizý josparlanǵan. Bul Eýropalyq odaqtyń ortasha úlesine sáıkes keledi.
«Qazaqstandaǵy qoqys óńdeý sektoryn damytqysy keletin yqtımal ınvestorlar tizimi bar. Bul sharalar kúresinderdi joıýǵa, polıgon salýǵa jumsalatyn bıýdjet shyǵyndaryn azaıtyp, ekologııaǵa, adam densaýlyǵyna, flora men faýnaǵa keletin nuqsandy tómendetedi», - dedi M. Myrzaǵalıev.
Eske sala ketsek, buǵan deıin mınıstr eldegi qoqys polıgondarynyń jaı-kúıin aıtyp berdi.
