Qazaqstanda kóktemgi egis jáne egin oraǵyna daıyndyq jumystaryna 97 mlrd. teńge baǵyttalady

ASTANA. QazAqparat - Búgin Ortalyq kommýnıkatsııalar qyzmetindegi brıfıngte Senat depýtaty Sergeı Plotnıkov kóktemgi egis naýqanyn qarjylandyrý jaıynda aıtyp berdi.

Senatordyń sózinshe, Úkimet naqtylaǵan 2015 jyldyń bıýdjeti týraly zań jobasynda bıýdjet tapshylyǵyna qaramaı, aýyl sharýashylyǵyna 20 mlrd. teńge qosymsha qarjy bólý usynylyp otyr. Onyń ishinde mal jáne qus sharýashylyǵyna 11,5 mlrd. teńge, aýyl sharýashylyǵy taýarlaryn óndirýshilerdi qarjylyq saýyqtyrýǵa 5 mlrd. teńge qarastyrylǵan.

Osy oraıda depýtat 2008-2009 jyldardaǵy daǵdarys kezinde aýyl sharýashylyǵy salasy ósimge qol jetkizgenin atap ótti.

Atap aıtqanda, kóktemgi egis jumystaryna jáne egin oraǵyna daıyndyq sharalaryn qarjylandyrýdyń jalpy kólemi 97 mlrd. teńgeni qurady. Aýyl sharýashylyǵy tehnıkasynyń lızıng baǵdarlamasy boıynsha 28,5 mlrd. teńge bólinedi. Bul baǵytta 1610 tehnıkany jetkizý josparlanyp otyr.

Esteńizge sala keteıik, bıylǵy 11 aqpandaǵy Memleket basshysynyń qatysýymen ótken Úkimet otyrysynda el ekonomıkasynyń qalyptasqan jaǵdaıy talqylanyp, 2015-2017 jyldarǵa arnalǵan bıýdjetti ońtaılandyrý máselesi qaraldy. Otyrysta Elbasy qazirgi ekonomıkalyq ahýalǵa baılanysty «Nurly jol» baǵdarlamasyn daǵdarysqa qarsy jańa sharalarmen tolyqtyryp, Agroónerkásiptik keshendi memlekettik qoldaýdy ulǵaıtýǵa tapsyrma berdi.