Qazaqstanda kóktemgi ańshylyqqa tyıym salynýy yqtımal
«Bul áli bekitilgen joq. Biraq bizde ekonomıkalyq saraptamadan sátti ótken bıologııalyq negizdeme bar. Qazir buıryq jobasynyń tıisti oń nátıjelerin kútip otyrmyz», - dedi Orman sharýashylyǵy jáne janýarlar álemi komıteti tóraǵasynyń orynbasary mindetin atqarýshy Narıman Júnisov.
Onyń bergen aqparaty boıynsha, respýblıka zańnamasyna sáıkes, kóktemde ańshylyq jasaýǵa tyıym salynǵan. Biraq úırek pen balshyqshynyń atalyqtaryna, valdshnepke, qurǵa ańshylyq etýge ruqsat etilgen. Ań men qustyń qalǵan túrlerin aýlaýǵa tyıym salynǵan.
«Keıde úırektiń atalyǵyn emes, analyǵyn atyp alǵan ańshylar ustalyp jatady. Olardyń jaýaby bir: «bytyra myltyq úırektiń atalyǵy ma, analyǵy ma tańdap jatpaıdy». Sondyqtan kóktemde barlyq qustarǵa tyıym salýǵa bul da bir sebepshi bolyp otyr», - dedi ol.
«Kóktemde ańshylyqqa shyǵýǵa tyıym salynbaǵandyqtan, keıbir ańshylar atyp alýǵa bolmaıtyn ań túrlerin qanjyǵasyna salyp jatady. Onyń ishinde tuıaqtylar da bar. Olardy biz ustap jatamyz», - dep atap ótti N. Júnisov.
Onyń naqtylaýynsha, buryn osyndaı tyıym salý týraly sheshim talqylanǵan, alaıda qazir ol ózektene tústi. Onyń basty sebebi - qazir qus popýlıatsııasynyń kúrt tómendeýi bolyp otyr. Onyń ústine shetelden keletin ańshylar da artyp ketken. Eger 2015 jyly zańsyz ań aýlaýdyń 636 faktisi tirkelse, 2016 jyly 758 oqıǵaǵa deıin ósken.
«Kóktemde qustardyń kóbeıetin tusy. Osy aralyqta ań aýlaý qustardyń uıa salýyna kedergi bolady jáne tabıǵı ósimge nuqsan keltiredi. Sonymen qatar kóktemde ańshylar iri atalyqtarǵa kóz súzedi, ol óz kezeginde qustardyń genofondyna úlken zardabyn tıgizýde», - dep atap ótti ol.
Eger atalmysh tyıym qoldanysqa ense, kóktemde ańshylyq etken azamattarǵa aıyppul salynady. Atap aıtqanda, ańshylarǵa 5 AEK kóleminde aıyppul taǵaıyndalady. Eger ol qaıtalanǵan jaǵdaıda 15 AEK aıyppul qarastyrylǵan.