Qazaqstanda kókónis baǵasy taǵy da qymbattady
ASTANA. QazAqparat - Naýryz aıynda kókónis baǵasy taǵy qymbattady, al jarma quny aıtarlyqtaı tómendegen, dep habarlady energyprom.kz.
2017 jyldyń naýryz aıynda kókónister segmentinde baǵanyń ósýi tirkeldi. Máselen, túıindi pııaz bir aıda 8,8%-ǵa qymbattap, kelisine 86,62 teńgeni kórsetken, kartop - 3,9%-ǵa, bir kelisi 108,95 teńgege deıin, oramjapyraq - 3,7%-ǵa, bir kelisi 92,17 teńgege deıin kóterilgen. Biraq, aqpan aıynyń qorytyndysynda da dál osy kókónisterdiń qymbattaǵany baıqalǵan edi. Qystyń sońǵy aıynda kartop quny qańtar aıyndaǵy baǵadan 7,9%, pııaz - 4,8%, oramjapyraq - 3%-ǵa qymbattaǵan.
Jemister arasynda naýryz aıynda banan qymbattaǵan (aıyna +1,5%) jáne almanyń quny bolar-bolmas ózgeriske ushyraǵan (+0,2%). Tsıtrýsty jemister baǵasy, kerisinshe, tómendegen - apelsınder 1,6%-ǵa, lımondar - 0,5%-ǵa arzandaǵan.
Et jáne et ónimderi segmentinde qoı eti (aıyna +1,5% , kelisi 1275,89 tg deıin) jáne sıyrdyń baýyry ǵana (+1,5%, kelisi 775,48 tg deıin) aıtarlyqtaı qymbattaǵan. Ózge et, balyq jáne qus ónimderine qosylǵan baǵa 1%-dan aspaǵan.
Sonymen birge, naýryz aıynda jumyrtqa quny ótken aıdan 3,7%, 10 danasy 275,88 teńgege deıin tómendegen. Aqpan aıynda da jumyrtqalar qańtarmen salystyrǵanda 4,2%-ǵa arzandady.
Sút jáne ashymal sút ónimderiniń baǵa ósimi de taýarlardyń basym bóliginde 1% aınalasynda qaldy.
Un jáne jarma ónimderiniń baǵasy da bir aıda 1% shamasynda qymbattaǵan.
Odan bólek, jarma segmentinde birneshe ónim boıynsha baǵalardyń tómendeýi baıqaldy: bir aıda kúrish 0,2%-ǵa, kelisi 287,56 tg deıin, arpa jarmasy - 0,3%-ǵa, kelisi 166,35 tg deıin, qaraqumyq - birden 1,4%-ǵa, kelisine 424,91 tg deıin arzandady. Onyń ústine, eń qymbat jarma sanalatyn qaraqumyq aqpan aıynda 0,1%-ǵa arzandaǵan.
