Qazaqstanda qoqys shyǵaratyn konteıner men kólikter jetispeıdi – mınıstr
ASTANA. KAZINFORM – Elimizde qoqys shyǵaratyn 133 myń konteıner bar jáne taǵy 60 myń konteınerge qajettilik bar. Bul týraly QR Ekologııa jáne tabıǵı resýrstar mınıstri Erlan Nysanbaev aıtyp berdi.
«Qaldyqtardy basqarýdyń mańyzdy bóligi – jetkilikti deńgeıde konteınerler men qoqys tasıtyn kóliktermen qamtamasyz etý. Búginde elimizde 133 myń dana konteıner bar, qosymsha taǵy 60 myń konteınerge qajettilik bar», - dedi E. Nysanbaev Úkimettiń búgingi otyrysynda.
Mınıstrdiń aıtýynsha, iri qalalarda 1681 qoqys tasıtyn kólik qyzmet etedi, qosymsha qajettilik shamamen 900 danany qurasa, onyń 223 danasy ınvestıtsııalyq jobalarda eskerilgen.
«Konteınerler men qoqys tasıtyn kólikter jergilikti bıýdjet pen jeke ınvestıtsııalar esebinen satyp alynýy kerek. Munda Qyzylorda jáne Jetisý oblystarynyń tájirıbesin atap ótkim keledi. Bul óńirlerde jobalar oblys ortalyǵynda ǵana emes, aýdandarda da pysyqtaldy. Sheshim qabyldaý barysynda qaldyqtardyń qalyptasý kólemderine, logıstıka men qajetti ınfraqurylymdy tıimdi ornalastyrýǵa basa nazar aýdaryldy. Bundaı tásildi ózge óńirlerge de taratýdy usynamyn», - dedi Ekologııa mınıstri.
Aıta keteıik, Qazaqstanda turmystyq qaldyqtyń 1 mln tonnasy ǵana qaıta óńdeledi.
Úkimet qaldyqtardy basqarý jobalaryn qarjylandyrýdyń jeńildetilgen tetigin bekitti. Munyń nátıjesinde brýschatka, lıýk, qoqys konteınerleri, shyny ydystar, streıch plenkalar, kólik bamperleri sııaqty halyqtyń basqa da tutyný taýarlary shyǵarylady.
