Qazaqstanda qoǵamdyq densaýlyq saqtaý qyzmeti qurylady - T.Dúısenova
Mınıstrdiń sózine qaraǵanda, Ekonomıkalyq yntymaqtastyq jáne damý uıymy elderiniń tájirıbesi negizinde Qazaqstanda qoǵamdyq densaýlyq saqtaý qyzmeti qurylmaq. Halyqaralyq jáne otandyq sarapshylar usynymy negizinde qurylatyn júıe negizinen epıdemıologııalyq qyzmet pen tamaqtanýdy ońtaılandyrý, salaýatty ómir saltyn qalyptastyrýdy biriktirý negizinde qurylatyn bolady. Atalǵan qyzmettiń negizgi fýnktsııalary - epıdemıologııalyq qadaǵalaýdy qamtamasyz etý, ınfektsııalyq jáne negizgi ınfektsııalyq emes aýrý túrlerine monıtorıng júrgizý jáne aldyn alý sharalaryna halyqty jumyldyryp, buǵan qatysty jurtshylyqtyń habardarlyǵyn arttyrý bolyp tabylady.
«Toqtala ketetin jaıt, 2014 jyldyń sońyna taman Sanıtarlyq-epıdemıologııalyq qyzmet Ulttyq ekonomıka mınıstrligine berilgen bolatyn. Al jańa baǵyt aıasynda biz 2016 jyl barysynda joǵaryda aıtylǵan fýnktsııalardy bólý jumystaryn júzege asyratyn bolamyz. Máselen, sonyń ishinde ınfektsııalyq aýrýlarǵa monıtorıng, den qoıý, taratpaý, olardyń oshaǵyn joıý sekildi jumystar men olardy úılestirý qyzmeti Densaýlyq saqtaý jáne áleýmettik damý mınıstrligine beriledi. Al tutynýshylardyń quqyqtaryn qorǵaýǵa qatysty máseleler Ulttyq ekonomıka mınıstrliginiń quramynda qalatyn bolady», - dedi Tamara Dúısenova.
Onyń aıtýynsha, qoǵamdyq densaýlyq saqtaý qyzmeti eki deńgeıden turady. Bul rette mınıstrlik deńgeıinde tutastaı respýblıka boıynsha epıdemıologııalyq qadaǵalaýlar jasalyp, ádistemelik qamtamasyz etýler, strategııalar ázirleý, azamattardyń densaýlyǵyn nyǵaıtý men jaqsartý ındıkatorlaryna monıtorıng jasalatyn bolady. Al óńirlik deńgeıde fýnktsııalardy júzege asyrý júkteledi. «Óńirlerdegi qyzmetter ózderiniń epıdemıologııalyq kartalaryn ıelenip, azamattardyń densaýlyǵyna áser etetin faktorlar boıynsha faktorlardy aıqyndaıdy», - dedi mınıstr.