Qazaqstanda qoǵamdyq oryndardaǵy graffıtıge tolyq tyıym salynýy múmkin
ASTANA. KAZINFORM — Qazaqstanda qoǵamdyq oryndarǵa zııan keltiretin graffıtıge tolyq tyıym salý usynyldy. Іshki ister mınıstrligi zańnamaǵa tıisti ózgerister engizýdi kózdep otyr, al talapty buzǵany úshin ákimshilik jaýapkershilik qarastyrylmaq. Bul týraly Úkimette ótken keńeste aıtyldy.
Vandalızm men qoǵamdyq keńistikterdiń búlinýine jol bermeý sharalary bólek qarastyryldy. ІІM vandalızm faktileriniń jolyn kesý boıynsha sharalar qabyldanyp jatyr. Mádenı mura eskertkishteri men tabıǵı nysandardy búldirgeni úshin 11 qylmystyq is tergeldi. Eriktilermen birlesip esirtki graffıtıi dep atalatyn 80 myń sýret pen jazý óshirildi.
Esirtkini nasıhattaǵany jáne jarnamalaǵany úshin 81 qylmystyq is qozǵaldy, 19 adam sottaldy. «Esirtkige jol joq» tsıfrlyq servısi aıasynda azamattar polıtsııaǵa 150 quqyq buzýshylyq faktisi týraly habarlady. Sondaı-aq nysandarǵa jedel basqarý ortalyǵynyń beınebaqylaý kameralary arqyly monıtorıng júrgiziledi.
Іshki ister mınıstri Erjan Sádenov osy saladaǵy zańnamany jetildirý jónindegi usynystaryn tanystyrdy. Atap aıtqanda, qoǵamdyq ǵımarattar men qurylystarǵa jazýlar men sýretter salýǵa tyıym engizip, bul talapty buzǵany úshin ákimshilik jaýapkershilik qarastyrý usynyldy.
Premer-mınıstr qalalardaǵy vandalızm men buzaqylyqtyń soraqy kórinisteriniń jolyn kesý jónindegi jumystyń mańyzdylyǵyn atap ótti. Tıisti tapsyrmalar berildi.
— Іshki ister mınıstrligi vandalızm men buzaqylyqty boldyrmaý úshin qoǵamdyq oryndarǵa zııan keltiretin „graffıtıdiń“ barlyq túrlerine tolyq tyıym salý maqsatynda zańnamaǵa ózgerister engizý jóninde usynystar daıyndaýy qajet, — dep tapsyrdy Premer-mınıstr.
Buǵan deıin Prezıdent ruqsatsyz graffıtıge zań júzinde tyıym salýdy tapsyrǵan bolatyn.
