Qazaqstanda kimder zań kómegin tegin ala alady

PETROPAVL. KAZINFORM — Qazaqstanda zań qyzmetterin tegin alý múmkindigi bar.

Memleket kepildik bergen zań kómegin alýǵa kelesi azamattardyń quqyǵy bar:

— Fızıkalyq tulǵalar:

Alıment óndirý, zeınetaqy men járdemaqy taǵaıyndaý, reabılıtatsııa, bosqyn nemese qandas mártebesin alý máseleleri boıynsha;

Ata-anasynyń qamqorlyǵynsyz qalǵan kámeletke tolmaǵan balalar;

Jynystyq zorlyq-zombylyqqa, adamdar saýdasyna, terrorızm aktilerine ushyraǵandar nemese azaptaýǵa tap bolǵan adamdarǵa, olardyń quqyqtary men zańdy múddelerin qorǵaý máseleleri boıynsha;

Asyraýshydan aıyrylǵandarǵa, jumys nemese qylmystyq quqyq buzýshylyq saldarynan densaýlyǵyna zııan keltirilgenderge qatysty máseleler boıynsha;

— Arnaıy sanattar:

Uly Otan soǵysynyń qatysýshylary, olarǵa teńestirilgender, basqa memleketterde áskerı is-qımyldarǵa qatysqan ardagerler, merzimdi áskerı qyzmette bolǵandar, birinshi jáne ekinshi toptaǵy múgedektigi barlar, zeınetkerler (kásipkerlik qyzmetpen baılanysty emes máseleler boıynsha);

Kópbalaly otbasylar (kásipkerlik qyzmetpen baılanysty emes máseleler boıynsha);

Kedeıshiliktiń sheginen tómen tabysy bar azamattar men otbasylar (kásipkerlik qyzmetpen baılanysty emes máseleler boıynsha).

Sotta tegin qorǵaý jáne ókildik etý

Memleket sondaı-aq sotta, qylmystyq qýdalaý organdarynda, memlekettik jáne memlekettik emes uıymdarda aqysyz zańdyq qorǵaýdy jáne ókildik etýdi kelesi jaǵdaılarda qamtamasyz etedi:

— Ákimshilik jaýapkershilikke tartylatyn tulǵalarǵa;

— Azamattyq isterde talapker men jaýapkerge, sondaı-aq ákimshilik sottardaǵy talapkerlerge;

Qylmystyq ister boıynsha kúdikti, aıyptalýshy, sottalýshy, aqtalǵan jáne jábirlenýshi taraptarǵa.

Qazaqstanda memleket kepildik bergen zań kómegine quqyǵy bar azamattar ony turǵylyqty jerine jáne júrgen jerine qaramastan ótinish bere alady. Sondaı-aq, zańdy kómek kórsetý týraly ótinishti zańdy ókilder olardyń atynan berýge quqyly.

Esterińizge salaıyq, biz buǵan deıin Qazaqstanda kim tisin tegin emdete alatynyn,  kimder áleýmettik kómekti úıde tegin alýǵa quqyly jáne tegin ota kimderge jasalatyndyǵyn jazǵan edik.