Qazaqstanda kimder nekesin tegin tirkeı alady

ASTANA. KAZINFORM – Jeńildikti paıdalaný úshin rastaıtyn qujattardy usyný qajet.

AHAT (AHAJ) qyzmeti tek týýdy, neke qııýdy nemese qaıtys bolýdy tirkeýmen shektelmeıdi.

AHAT organdary jeke málimetterdi ózgertý, áke bolý faktisin anyqtaý jáne bala asyrap alýdy resimdeýmen de aınalysady. Sonymen qatar bul jerde qujattardyń túpnusqasy beriledi, joǵalǵan nemese urlanǵan jaǵdaıda kóshirmelerge tapsyrys bere alasyz, sondaı-aq buryn tirkelgen aktilerdiń jazbalaryn qalpyna keltire alasyz.

Bul qujattardyń barlyǵy AHAT muraǵatynda 1 jyldan 75 jylǵa deıin saqtalady.

«Azamattarǵa arnalǵan úkimet» memlekettik korporatsııasy azamattardyń jekelegen sanattary neke qııýdy jáne ózge de azamattyq hal aktilerin memlekettik baj tóleminsiz tirkeı alatynyn habarlaıdy.

Olarǵa mynalar jatady:

- Uly Otan soǵysynyń ardagerleri jáne jeńildikter boıynsha olarǵa teńestirilgen tulǵalar.

- Uly Otan soǵysy jyldaryndaǵy janqııarlyq eńbegi men minsiz áskerı qyzmeti úshin burynǵy KSRO ordenderimen jáne medaldarymen marapattalǵan tulǵalar.

- 1941 jylǵy 22 maýsymnan 1945 jylǵy 9 mamyrǵa deıingi kezeńde keminde alty aı jumys istegen (qyzmet etken) tyl eńbekkerleri.

- Basqa memleketter aýmaǵyndaǵy áskerı qımyl ardagerleri.

- Múmkindigi shekteýli azamattar.

- Bala kezinen múmkindigi shekteýli azamattardyń nemese múgedek balalardyń ata-analary, qorǵanshylary (qamqorshylary).

Buǵan deıin Qazaqstanda tólqujat pen jeke kýálikti tegin alýǵa, aqyly joldar men qoǵamdyq kólikterde jeńildikpen júrýge, sondaı-aq notarıaldyq qyzmetterdi tegin alýǵa kimniń quqyǵy bar ekeni habarlanǵan bolatyn.