Qazaqstanda kimder mıllıon teńgeden artyq jalaqy alady
ASTANA. KAZINFORM — Qazaqstandyqtar qaı salada joǵary jalaqy alady, qandaı mamandyqtarda eńbekaqy tómen jáne óńirler arasyndaǵy tabys aıyrmashylyǵy qanshalyqty? Kazinform tilshisi Ulttyq statıstıka bıýrosynyń derekterin zerdelep, eldegi jalaqy deńgeıine qandaı faktorlar áser etetinin anyqtady.
Jarııalanǵan málimetterge sáıkes, Qazaqstanda ortasha saǵattyq jalaqy 2 508 teńgeni quraıdy. Er adamdar saǵatyna orta eseppen 2 859 teńge alsa, áıelderdiń jalaqysy — 2 180 teńge, ıaǵnı zerttelgen derekter boıynsha áıelderdiń saǵattyq eńbekaqysy erlerge qaraǵanda shamamen 24 paıyzǵa tómen.
Jalaqy mólsherine qyzmetkerlerdiń jasy da áser etedi. Eń joǵary ortasha saǵattyq jalaqy 35–44 jas aralyǵyndaǵy qazaqstandyqtarǵa tıesili — 2 773 teńge. Al 45–54 jas tobynda bul kórsetkish sál tómendep, 2 658 teńgeni quraıdy. 25–34 jastaǵy qyzmetkerler saǵatyna orta eseppen 2 396 teńge alady. 16–24 jas aralyǵyndaǵy jastardyń saǵattyq jalaqysy — 1 757 teńge. Al 65 jastan asqan jumysshylarda bul kórsetkish 1 947 teńgege teń.
Alaıda jalaqy aıyrmashylyǵy tek jas pen jynysqa baılanysty emes. Óńirler arasynda da aıtarlyqtaı alshaqtyq bar. Máselen, ortasha saǵattyq jalaqynyń eń joǵary kórsetkishi Almaty qalasynda tirkelgen — 3 471 teńge. Ekinshi orynda Astana qalasy — 3 286 teńge. Jalaqysy joǵary óńirler qatarynda Mańǵystaý oblysy (3 188 teńge), Ulytaý oblysy (3 186 teńge) jáne Atyraý oblysy (3 134 teńge) bar.
Al birqatar óńirde saǵattyq eńbekaqy áldeqaıda tómen. Mysaly, Túrkistan oblysynda bul kórsetkish 1 771 teńge, Soltústik Qazaqstan oblysynda — 1 823 teńge, Jetisý oblysynda 1 847 teńge. Salystyrsaq, Almaty men Túrkistan oblysyndaǵy saǵattyq jalaqynyń aıyrmashylyǵy eki esege jýyq.
Ulttyq statıstıka bıýrosy jekelegen mamandyqtar boıynsha da málimet usynǵan. Olardyń arasynda ortasha aılyq ataýly jalaqy mólsheri boıynsha uıym basshylary kósh bastap tur. Olardyń tabysy — 1 101 149 teńge. Tseh basshylary orta eseppen 938 340 teńge, al mamandandyrylǵan bólimshelerdiń basshylary 715 233 teńge alady.
Injenerlik mamandyqtar arasynda eńbekti qorǵaý jónindegi ınjenerlerdiń jalaqysy 645 015 teńgeni, ınjener-tehnologtardyń jalaqysy 616 991 teńgeni, ınjener-energetıkterdiń jalaqysy 615 093 teńgeni quraıdy.
Áleýmettik saladaǵy mamandardyń jalaqysy budan tómen. Dárigerler orta eseppen 491 385 teńge, joǵary oqý oryndarynyń oqytýshylary 467 729 teńge, mektep muǵalimderi 415 042 teńge alady. Medbıkelerdiń ortasha jalaqysy — 264 636 teńge, tárbıeshilerdiki — 271 309 teńge.
Basqa da suranysqa ıe mamandyqtar boıynsha aıyrmashylyq baıqalady. Zańgerlerdiń ortasha aılyq jalaqysy 541 967 teńgege, ekonomısterdiki 511 843 teńgege, satýshylardiki 474 611 teńgege jetedi. Al qoǵamdyq tamaqtaný salasynda aspazdar orta eseppen 192 626 teńge, daıashylar 223 510 teńge alady. Qosalqy jumysshylardyń jalaqysy — 217 448 teńge.
Ekonomıka salalary boıynsha salystyrǵanda da osyǵan uqsas kórinis baıqalady. Ortasha aılyq jalaqy mólsheri boıynsha qarjy jáne saqtandyrý qyzmeti kósh bastap tur — 1 021 234 teńge. Ekinshi orynda aqparat jáne baılanys salasy, munda qyzmetkerler orta eseppen 846 260 teńge alady. Kólik jáne qoımalaý salasynda bul kórsetkish 559 627 teńge, al turý jáne tamaqtaný qyzmetterinde 519 215 teńgeni quraıdy.
Kóterme jáne bólshek saýda salasyndaǵy ortasha aılyq jalaqy — 473 705 teńge, jyljymaıtyn múlikpen operatsııalar salasynda — 438 188 teńge. Memlekettik basqarý salasynda qyzmetkerler orta eseppen 335 276 teńge, densaýlyq saqtaý jáne áleýmettik qyzmet kórsetý salasynda 355 102 teńge alady. Bilim berý salasyndaǵy kórsetkish — 327 723 teńge, óner, oıyn-saýyq jáne demalys salasynda — 315 248 teńge.
Buǵan deıin 2027 jyldan bastap 1,8 mln qazaqstandyqtyń jalaqysy ózgeretinin jazǵan edik.
