Qazaqstanda qyzylshamen syrqattanýshylyq 30%-ǵa tómendedi

ASTANA. KAZINFORM – Elimizde qyzylshamen syrqattanýshylyqtyń tómendeýi baıqalyp otyr. Máselen, keıingi bir aptanyń ishinde ınfektsııa juqtyrý jaǵdaılarynyń sany shamamen úshten birge azaıdy. 

Syrqattanýshylardyń basym bóligi ekpe almaǵandar ekeni belgili boldy. Bul ekpeniń tıimdiligin dáleldeıdi.

– Qazaqstan Respýblıkasy Densaýlyq saqtaý mınıstrliginiń derekterine sáıkes, keıingi aptada qyzylshanyń 212 jaǵdaıy tirkelgen, al onyń aldyndaǵy aptada – 302 jaǵdaı tirkelgen. Bul syrqattanýshylyqtyń 30%-ǵa tómendegenin kórsetedi, - delingen habarlamada. 

Eń kóp syrqattanýshylyq kelesi óńirlerde tirkelgen: Astana qalasy – 46 jaǵdaı, Pavlodar oblysy – 38 jaǵdaı, Almaty qalasy – 20 jaǵdaı, Qaraǵandy oblysy – 19 jaǵdaı. 

2025 jyldyń qorytyndysy boıynsha elde qyzylshanyń 4 240 jaǵdaıy tirkelgen, onyń ishinde 76,4%-y egilmegender. Egilmegenderdiń arasynda balalardyń edáýir bóligi ekpeden bas tartý, medıtsınalyq qarsy kórsetilimder nemese ekpe jasyna jetpeý sebepterine baılanysty vaktsınatsııalanbaǵan.

Jyl basynan beri qyzylshaǵa qarsy josparly vaktsınatsııalaý jalǵasyp jatyr. Búgingi tańda 1 jastaǵy 69 myń bala jáne 6 jastaǵy 66,8 myń bala egildi. 

Sonymen qatar qosymsha ımmýndaý sheńberinde shamamen 1,5 mln adam, onyń ishinde kishi jastaǵy balalar men qaýip toptaryna jatatyn tulǵalar ekpe aldy. 

Sondaı-aq tolyqtyrýshy ımmýndaý júrgizilýde: jyl basynan beri 18 jasqa deıingi 58,2 myń bala men jasóspirim qamtyldy. 

Jalpy alǵanda, qyzylsha boıynsha epıdemıologııalyq jaǵdaı baqylaýda qalyp otyr, al vaktsınatsııalaý profılaktıkanyń eń tıimdi sharasy bolyp qala beredi. 

Eske sala keteıik, osyǵan deıin Batys Qazaqstanda qyzylsha juqtyrǵandar sany 170-ke jýyqtaǵanyn jazǵanbyz.