Qazaqstanda qyzylshaǵa qarsy mindetti jappaı ımmýndaý bastaldy — Ajar Ǵınııat

Almatyǵa is-saparmen Densaýlyq saqtaý mınıstri Ajar Ǵınııat keldi. Sapar barysynda mınıstr jýrnalıstermen baspasóz máslıhatyn ótkizdi, dep habarlaıdy Kazinform.

Densaýlyq saqtaý mınıstri jýrnalıstermen Almaty qalalyq N5 emhanada kezdesti. 

Mınıstrdiń sózinshe, búginde el boıynsha, onyń ishinde Almaty qalasynda qyzylsha aýrýy boıynsha jaǵdaı turaqty emes.

«Búgingi kúni negizinen 5 jasqa deıingi balalar, onyń ishinde 1 jasqa deıingi balalar qyzylshamen aýyryp jatyr. Biz olardy aýrýhanaǵa jatqyzyp, aýrýy asqynyp ketpeýi úshin 3-4 kún boıy baqylaımyz. Bizdiń búgingi basty mindetimiz — qyzylshadan qandaı da bir ólim-jitimdi boldyrmaý jáne aýrýdyń asqynýyn aldyn alý. Sondyqtan biz kishkentaı balalardy ınfektsııalyq statsıonarlarǵa jatqyzamyz», — dedi ol.

Onyń aıtýynsha, búginde el boıynsha statsıonarlarda tósek-oryndardyń 52%-y bos emes.

«Qyzylsha aýrýy aýa tamshylary arqyly beriledi. Búginde naýqastardyń kóbeıý sebebi, sońǵy 5 jylda ekpe almaǵan adamdar kóbeıgen, tıisinshe olarda ımmýnıtet joq. Sol sebepti olar bul aýrýmen aýyrady», - dedi mınıstr.

Ol qazir jaǵdaı baqylaýda ekenin aıtty. 6 qarashadan bastap el boıynsha qyzylsha, qyzamyq pen parotıtke qarsy balalardy qosymsha jappaı ımmýndaý bastaldy.

«Qosymsha ımmýndaý ata-analarynyń ruqsatymen ekpe almaǵan balalarǵa júrgizildi, al qazirgi ýaqytta ınfektsııany toqtatý úshin mindetti jappaı ımmýndaý bastaldy», - dedi Ajar Ǵınııat.

Eske salaıyq, Ajar Ǵınııat osyǵan deıin qyzylsha aýrýy órshigen óńirlerdi aıtqan edi. Onyń ishinde Shymkent, Almaty qalalarynda, Jambyl, Almaty, Mańǵystaý, Aqtóbe, Qyzylorda jáne Atyraý oblystary bar.

Sondaı-aq Úkimet otyrysynda Premer-Mınıstr Álıhan Smaıylov qyzylshamen kúreske jergilikti ákimder belsendi atsalysýy kerektigin aıtty.

«Aýrýdyń taralýyn toqtatý kerek. Qyzylsha asqynyp ketse, balalardyń densaýlyǵyna asa qaýip tóndiredi. Sondyqtan onymen tek densaýlyq saqtaý júıesi ǵana emes, búkil qoǵam bolyp kúresýimiz qajet», - dedi Premer.