Qazaqstanda qyzylshaǵa baılanysty karantın engizilmeıdi

Úkimet otyrysynan keıin ótken brıfıngide tilshiler Densaýlyq saqtaý mınıstrligi ókilderinen qyzylshaǵa baılanysty karantın rejımin engizý qanshalyqty yqtımal ekenin surady, dep habarlaıdy Kazinform.

«Qyzylsha – vaktsınamen basqarýǵa bolatyn ınfektsııa. Sondyqtan búginge deıin eshqandaı shekteý sharalary engizilgen joq. Engizý týraly jospar da joq. Biraq biz ahýaldy baqylaýda ustap otyrmyz. Qandaı da bir uıymdasqan ujymda syrqattaný deńgeıi joǵary ekenin, ekpe almaǵan balalardyń sany shekti mólsherden asyp ketkenin anyqtasaq, týra sol nysanda shara qoldanylady. Ol mektepke deıingi bilim berý nysany, orta mektep nemese joǵary oqý orny bolýy múmkin», - dedi Sanıtarııalyq-epıdemıologııalyq baqylaý komıteti tóraǵasynyń orynbasary Záýre Ahmetova.

Aıtýynsha, qazir qyzylsha negizinen balalar arasynda tarap jatyr. Halyq jappaı juqtyryp, áseri ekonomıkalyq-áleýmettik ahýalǵa áser etken kezde ǵana epıdemııa jarııalanady. Osyndaı jaǵdaıda ǵana shekteý sharalary qoldanylyp, buqaralyq mádenı is-sharalardy uıymdastyrýǵa tyıym salynady.

«Ahýal baqylaýda. Qosymsha aldyn alý sharalary engizilip jatyr. Sondyqtan qazir aýrýdyń órshýi ǵana bolyp jatyr dep esepteımiz», – dedi DSM ókili.

Aıta keteıik, búgin Úkimet otyrysynda A.Ǵınııat tek qarasha aıynda 6 myńnan astam qazaqstandyq qyzylsha juqtyrǵanyn málim etti. Onyń ishinde 30 bala jansaqtaý bóliminde jatyr. Sondaı-aq mınıstr atalǵan indetten vaktsına almaýdyń saldaryn atady. 

Premer-Mınıstr Álıhan Smaıylov mundaı qaýipti vırýspen vaktsınalaýdan ózge jolmen kúresý múmkin emes ekendigin atap ótti.