Qazaqstanda qyzylsha juqtyrǵandardyń sany 11,5 ese azaıdy

ASTANA. KAZINFORM — Qyzylshaǵa qarsy vaktsınalaý jalǵasyp jatyr. Bul týraly QR Densaýlyq saqtaý mınıstrligi málim etti. 

— Qazirgi kezde qyzylsha boıynsha eldegi epıdemıologııalyq jaǵdaı turaqtanýda. Osy jyldyń 7 aıynda qyzylsha juqtyrýdyń 2462 jaǵdaıy tirkeldi. Byltyrǵy osyndaı kezeńmen salystyrǵanda, syrqattaný kórsetkishi 11,4 esege tómendedi (2024 jylǵy 7 aıda — 27 760 jaǵdaı). Naýqastardyń 75 paıyzy vaktsına egilmegen balalar men egý mártebesi belgisiz adamdarǵa tıesili. Qyzylshany juqtyrýdyń basym bóligi 5 jasqa deıingi balalar arasynda tirkelip jatyr, — delingen mınıstrliktiń Kazinform agenttigine bergen jaýabynda.

Vedomstvo aqparatyna qaraǵanda, epıdemıologııalyq jaǵdaıdy turaqtandyrý boıynsha epıdemııaǵa qarsy is-sharalar jalǵasyp jatyr. Onyń ishinde profılaktıkalyq ekpelerdiń ulttyq kúntizbesi aıasynda josparly vaktsınatsııalaý (qyzylshaǵa qarsy josparly vaktsınatsııadan 1 jastaǵy 194 myń bala jáne 6 jastaǵy 197 myń bala egildi), buryn vaktsınatsııany ótkizip alǵan 18 jasqa deıingi balalarǵa tolyqtyra vaktsınatsııalaý (180 myńnan astam adam qamtyldy) jasalyp otyr.

Eske salsaq, Almatyda qyzylsha juqtyrǵandardyń sany 13 ese azaıǵanyn jazǵan edik.