Qazaqstanda qyzylsha óńdeıtin iri zaýyt salynady, joba quny 200 mln dollar

ASTANA. KAZINFORM –  Aýyl sharýashylyǵy mınıstri Aıdarbek Saparov túrkııalyq Safi Holding kompanııasynyń bas atqarýshy dırektory Safı Atakanmen kezdesý ótkizdi.

Kelissóz barysynda Qazaqstan aýmaǵynda qant zaýytyn salý máseleleri talqylandy. 

Túrkııadaǵy eń iri ónerkásiptik holdıngterdiń biri sanalatyn Safi Holding jylyna 140 myń tonnaǵa deıin qant óndiretin joǵary tehnologııalyq zaýyt salý jobasyn júzege asyrýǵa múddeli.

Zaýyttyń qyzylsha óńdeý qýaty — 1 mln tonna. Jobanyń boljamdy ınvestıtsııa kólemi — 150–200 mıllıon AQSh dollary. Qazirgi ýaqytta ınvestorlar zaýytty ornalastyrý úshin qolaıly óńirlerdi qarastyrýda. Ornalasatyn oryndy tańdaýdaǵy basty faktorlar — qant qyzylshasyn ósirýge jaramdy egistik jer kóleminiń jetkiliktiligi jáne ınfraqurylymmen qamtamasyz etilýi.

Aýyl sharýashylyǵy mınıstrligi jobany iske asyrý úshin tolyq qoldaý kórsetýge daıyn ekenin, sonyń ishinde qoldanystaǵy zańnama aıasynda memlekettik qoldaý sharalaryn usynýǵa ázir ekenin rastady.

— Atalǵan jobany iske asyrýda jan-jaqty qoldaý kórsetiledi, — dep atap ótti Aıdarbek Saparov.

Óz kezeginde Safı Atakan kórsetilgen qyzyǵýshylyq úshin alǵysyn bildirip, Qazaqstannyń qant salasyn damytýǵa qolaıly agroónerkásiptik áleýetke ıe ekenin atap ótti.

Aıta ketelik mınıstr qantpen ishki qamtý jaıly sensatsııalyq boljam aıtqan edi.